Иосиф Кобзон истәлегенә багышланган Бөтенроссия шигырьләр һәм җырлар конкурсына гаризалар кабул ителә

Иҗади ярышта Казаннан сүз һәм көй авторлары, башкаручылар, иҗат коллективлары катнаша ала.

Фото: grinlandia.ru

(Казан шәһәре KZN.RU, 18-нче ноябрь). Иосиф Кобзон истәлегенә багышланган «Мин яратам сине, тормыш!» дигән Бөтенроссия читтән торып шигырьләр һәм җырлар конкурсында катнашу өчен гаризалар кабул итү башланды. Иҗади ярышта Казаннан сүз һәм көй авторлары, башкаручылар, иҗат коллективлары катнаша ала.

Быел конкурс читтән торып ике этапта узачак. Аларның беренчесе 15-нче ноябрьдә старт алды һәм киләсе елның 30-нчы апреленә кадәр дәвам итәчәк. Аның нәтиҗәләре буенча жюри конкурс дипломантларын билгеләячәк. Сүз уңаеннан, артистларны бәяли торган экспертлар арасында автор-башкаручы Сергей Трофимов (Трофим) һәм шагыйрь-җырчы Александр Шаганов та бар.

Икенче этап кысаларында конкурс лауреатларын билгеләү планлаштырыла. Моннан тыш, онлайн-тавыш бирү юлы белән «Халык җиңүчесе» сайланачак. Быел ике махсус номинация барлыкка килде: «Яшьләр остаханәсе» (35 яшькә кадәрге авторлар һәм башкаручылар өчен) һәм «Иосиф Кобзон репертуарыннан җырны иң яхшы башкару» номинацияләре.

Конкурсның ахыргы нәтиҗәләре 2021 елның 31-нче маенда билгеле булачак. Җиңүчеләр дипломнар һәм акчалата призлар, шулай ук «Гринландия» фестиваленең төп сәхнәсенә Россия эстрадасы йолдызлары һәм автор җырын иң яхшы башкаручылар катнашында йомгаклау гала-концертында чыгыш ясау мөмкинлеге алачак.

Конкурста катнашу өчен, номинацияне һәм аудио-, видео- яки конкурс әсәре булган текст файлын күрсәтеп, гариза әзерләргә кирәк. Материаллар grinlandia-kirov@mail.ru электрон почтасы яки «ВКонтакте» социаль челтәрендәге «Гринландия» паблигында кабул ителә. Тулырак мәгълүматны конкурс турындагы нигезләмәдә яки сайтта табарга була.

Шулай ук укыгыз

Барлык яңалыклар