Казан проектлары «Яшисе килә торган шәһәр» XIV Халыкара смотр-конкурсында дипломнар белән бүләкләнде

Бу елның бәйгесендә дүрт илдән 33 шәһәр катнашты.

Фото: Казан шәһәре KZN.RU

(Казан шәһәре KZN.RU, 28-нче декабрь). Казанның дүрт проекты Мәскәүдә узган «Яшисе килә торган шәһәр» XIV Халыкара смотр-конкурсы жюрилары тарафыннан билгеләп үтелде. Бәйгедә дүрт илдән 33 шәһәр катнашты.

Конкурста, гадәттәгечә, административ-территориаль берәмлекләрнең эре үзәкләре һәм Бәйсез Дәүләтләр Бердәмлеге һәм Евразия икътисадый берлегендә катнашучы дәүләтләрнең башка эре шәһәрләре, технологияләрне эшләүчеләр, товарлар һәм хезмәтләр җитештерүчеләр, массакүләм мәгълүмат чаралары вәкилләре катнашты.

Бәяләрне чыгарганда экспертлар оештыру карарларының сыйфаты һәм нәтиҗәлелеге, алынган социаль һәм икътисадый нәтиҗә, башка шәһәрләрдә практиканы куллану мөмкинлеге кебек күрсәткечләрне исәпкә алды.

Жюри Татарстан башкаласында гамәлгә ашырылган дүрт проектны билгеләп үтте: «Акчарлак күле» шәһәр паркын төзекләндерү, рекреацион һәм тернәкләндерү зонасы булдыру, мәктәпләрдә сәламәт туклану оештыру, «Тәмле Казан» гастрономия фестивален үткәрү, йортсыз хайваннарны яклау системасын булдыру һәм аларның санын гуманлы җайга салу.

«Яшисе килә торган шәһәр» шәһәр практикаларының смотр-конкурсы Халыкара башкала һәм эре шәһәрләр ассамблеясе (МАГ) тарафыннан инициацияләнде һәм БДБ Башкарма комитеты, Евразия икътисадый комиссиясе (ЕЭК), РФ Дәүләт Думасының Федератив корылыш һәм җирле үзидарә мәсьәләләре комитеты, Бөтенроссия җирле үзидарә советы (ВСМС) белән берлектә уздырыла.

Конкурста җиңүчеләрне бүләкләү һәм дипломнар тапшыру тантанасы Мәскәүдә 2022 ел башында узачак, дип хәбәр иттеләр Туризмны үстерү комитетында.

Жюри әгъзалары Казан тәҗрибәләрен беренче тапкыр гына билгеләп үтми. Узган ел шәһәр шулай ук бүләккә лаек булды.