Халык санын алу фотобәйгесендә катнашуга гаризалар алу дәвам итә

Бәйгегә килгән эшләр өч номинация буенча каралачак.

(Казан шәһәре KZN.RU, 18-нче август). Казанда яшәүчеләр «Объективта - ил» бөтенроссия халык санын алу фотобәйгесендә катнаша ала. Гаризалар 30-нчы сентябрьгә кадәр кабул ителә. Бәйгегә килгән эшләр өч номинация буенча каралачак.

Конкурста 18 яшькә җиткән россиялеләр катнаша ала. Моның өчен Бөтенроссия халык санын алу - 2020 рәсми сайтында теркәлергә һәм махсус форманы тутырырга, эшкә сылтама күрсәтергә кирәк.

Конкурс шартлары буенча фоторәсемнәрне Instagram социаль челтәрендә урнаштырырга, #фотоконкурс_перепись хештегын куярга һәм @strana2020 актив сылтамасын билгеләргә кирәк. Аккаунтның барлык кулланучылар өчен дә ачык булуы мөһим, ә эшләр png яки jpeg форматларында башкарылырга тиеш. Бер катнашучы өч эш тәкъдим итә ала. Конкурска гаризалар 2020 елның 30-нчы сентябренең Мәскәү вакыты буенча 12.00 сәгатенә кадәр кабул ителә.

Катнашучылар үз эшләрен өч номинациядә күрсәтә ала. Беренчесе - «Випинга илеңне күрсәт» - Бөтенроссия халык санын алу талисманы Випин кошы катнашында үз шәһәреңнең яисә авылыңның күркәм һәм колоритлы истәлекле урыннарын төшерү. Талисман цифрлы технологияләр кулланып ясалган эшләнмәләр, рәсем, костюм яки сурәтләр рәвешендә тәкъдим ителергә мөмкин. «Традицияне саклыйбыз» номинациясендә фотоэшләр дә катнаша, аларда төрле регионнарда, шул исәптән милли киемнәрдәге кешеләрнең якты образлары, шулай ук этник кухня ризыклары, йолалар һәм бәйрәмнәр сурәтләре сурәтләнгән булырга тиеш. «Гаилә альбомы» номинациясендә берничә буынның фотосурәтләре кабул ителә. Һәр фото, номинацияләрнең берсен күрсәтеп, кыскача тасвирламалар белән бергә тапшырылырга тиеш.

Бәйге призерлары ике этапта билгеләнәчәк: тавыш бирү ярдәмендә ВПН-2020 сайтында һәм жюри әгъзалары тарафыннан. Беренче этап барышында үз тавышын теләсә кайсы теркәлгән кулланучы бирә ала, ул үзенә ошаган эшкә «Ошый» тамгасын куярга тиеш була. Икенче этапта жюриның һәр әгъзасы лаеклы эшләрне сайлаячак. Конкурс нәтиҗәләре ВПН-2020 сайтында һәм социаль челтәрләрдәге рәсми битләрдә 2020 елның 15-нче октябреннән дә соңга калмыйча бастырылачак.

Һәр номинациядә өч премия гамәлгә куелган: 25 мең, 15 мең һәм 10 мең сум. Жюри шулай ук фотоконкурска гран-при - 50 мең сум бирәчәк. Моннан тыш, призерларга тиешле премия бирүне раслый торган электрон дипломнар җибәреләчәк, дип хәбәр итә ВПН медиаофисы. Конкурс турындагы нигезләмә белән түбәндәге сылтама буенча танышырга мөмкин.

Исегезгә төшерәбез, Казан блогерлары һәм авторлык медиалары шулай ук Бөтенроссия халык санын алуны яктырту буенча конкурста катнаша ала. Гаризалар 1-нче сентябрьгә кадәр кабул ителә.

Шулай ук укыгыз

Барлык яңалыклар