«Сәлам, Татарстан!»: Казанда балалар өчен иҗади дәресләр циклы узачак

Чараларга теркәлү 23 гыйнварда башлана

23–25 гыйнвар көннәрендә Казанда балалар өчен бушлай иҗат дәресләре циклы узачак. Балалар «Сәлам, Татарстан!» рәсемле юл күрсәткече буенча зур карталар һәм шәһәр панорамалары, шулай ук оригами техникасында авторның рәсемле зиналары (зур булмаган журнал) төзиячәкләр. Чаралар берьюлы өч шәһәр мәйданчыгында – «Смена» заманча мәдәният үзәгендә, «Ак Чәчәкләр» бульвары күшәгендә һәм Мәскәү базарында узачак. Катнашу бушлай, алдан язылу буенча.

Беренче дәрес – «Татарстанның җанлы панорамалары» – 23 гыйнварда 18:00 сәгатьтә «Смена» ЗМҮ лекториясендә узачак. Катнашучылар, китап панорамаларыннан илһамланып, республиканың яраткан шәһәрләре белән поп-ап панорамалары булдырачаклар. Дәресне рәссам-каллиграф һәм дизайнер Мидат Вәлиев һәм иллюстратор Эльмира Газизова үткәрәчәк.

24 гыйнварда 15:00 сәгатьтә «Ак Чәчәкләр» бульвары күшәгендә «Кошлар очышы биеклегеннән» дәресе узачак. Балалар Татарстанның биеклектән ничек күренүе турында хыялланачаклар һәм кәгазь һәм картоннан республиканың коллектив күләмле картасын төзиячәкләр. Укытучылар: дизайнер Юлия Диярова һәм Эльмира Газизова. Һәр катнашучы үзе белән эшнең бер өлешен алып китә алачак.

«Татарстан турында истәлекләр» финал дәресе 25 гыйнварда 11:00 сәгатьтә Мәскәү базарының икенче катында узачак. Катнашучылар яраткан урыннары турында шәхси хатирәләре белән уртаклашачаклар һәм оригами техникасында үзләренең иллюстрацияле зиналарын булдырачаклар. Дәресне рәссам-иллюстратор Әминә Шәрифуллина һәм Эльмира Газизова үткәрәчәк.

Чарада катнашу өчен теркәлү таләп ителә, ул чарага ике көн кала ачылачак.

Дәресләр циклы «Смена Дети» сәнгать студиясе тарафыннан Татарстан Республикасы шәһәрләрен үстерү институты һәм А+А балалар нәшрияты белән берлектә әзерләнде. Проект «Казан парклары һәм скверлары Дирекциясе» МБУ һәм Мәскәү базары ярдәмендә гамәлгә ашырыла.

Шулай ук укыгыз

Барлык яңалыклар