Казанның реклама бизнесы вәкилләренә шәһәр бюджетына чираттагы түләүләрне кичектереп торырга мөмкинлек бирделәр

Казан Мэры тармакта хәлне күзәтеп торырга һәм реклама операторлары белән берлектә алга таба карарлар кабул итәргә кушты.

Фото: Денис Гордийко

(Казан шәһәре KZN.RU, 11 нче апрель, Юлия Летникова). Казан Башкарма комитеты реклама агентлыкларына шәһәр бюджетына бер квартал өчен түләүләрне бер елга кичектерергә мөмкинлек бирде. Мондый карар чит ил компанияләре базардан китү сәбәпле кабул ителде, бу исә реклама конструкцияләрен тутыруның кимүенә китерде. Реклама бизнесына ярдәм итү чаралары турында бүгенге эшлекле дүшәмбе вакытында Тышкы реклама һәм мәгълүмат идарәсе башлыгы Әскәр Баһаветдинов хәбәр итте.

Апрель аенда шәһәрнең реклама конструкцияләре 30-40% ка гына эшли. Тармакка ярдәм итү максатыннан Казан Башкарма комитеты агымдагы квартал өчен түләүнең яртысын киләсе елга – 2022 елның 31 нче мартыннан 2023 елның 31 нче мартына күчерү турында карар кабул итте.

«Күрсәтелгән ярдәм чараларын исәпкә алып, шәһәр бюджетына планлы керемнәр 398 млн сум тәшкил итәчәк. Агымдагы ел башыннан бюджетка инде 77 млн сум акча кергән, шуның 21 млн сумы – 2020 елга кичектерелгән түләүләр. Элек билгеләнгән түләү графиклары үтәлә, бюджет алдында бурыч тулысынча түләнгән», - дип аңлатты Тышкы реклама һәм мәгълүмат идарәсе башлыгы.

Казан Мэры Илсур Метшин шәһәрнең пандемия чорында ук чыгымнар кичергәнен искә төшерде. «Реклама бизнесына ярдәм итү буенча күрелгән чаралар төрле мәйданчыкларда тикшерелде. Җиткерелгән фикерләр күрсәткәнчә, алар нәтиҗәле булып чыкты. Без аңлы рәвештә 2020 елда шәһәр бюджетына 145 млн сум акча алып бетермәдек, 2021 һәм 2022 елларга түләүләрне күчердек», – дип искәртте ул. «Көнбатыш компанияләренең китүе реклама базарын какшатты. Хәлне контрольдә тотарга һәм реклама операторлары белән берлектә карарлар кабул итәргә кирәк», – диде И.Метшин.

Россия коммуникация агентлыклары ассоциациясе экспертлары мәгълүматларына караганда, 2021 елда Казан базары күләме 27% ка арткан һәм 787 млн сум тәшкил иткән. Реклама инвентаре 40% ка кыскаруга карамастан, Казан ил шәһәрләре арасында реклама бирүчеләр өчен иң яхшы шәһәрләр өчлегендә тора.