Реконструкциядән соң Осиново урамындагы автомобиль юлы дүрт полосага кадәр киңәячәк

1,4 км озынлыктагы участокны ремонтлау «Салават күпере» микрорайонында яшәүчеләргә транспорт хезмәте күрсәтүне яхшыртырга мөмкинлек бирәчәк.

Фото: Марат Мугинов

Казан шәһәре KZN.RU, 16-нчы август, Зилә Гайфи). Казанда Осиново урамында автомобиль юлын реконструкцияләүгә әзерлек эшләре алып барыла, бу «Салават күпере» микрорайонында яшәүчеләргә транспорт хезмәте күрсәтүне яхшыртырга ярдәм итәчәк. 1,4 км озынлыктагы участокта урамны ике рәттән дүрт рәткә кадәр киңәйтү, тротуарлар, велоюллар, тышкы яктырту челтәрләре төзү, инженерлык коммуникацияләрен яңадан урнаштыру, светофор объектлар һәм тавыштан саклау экраннары урнаштыру планлаштырыла. Осиново урамы киңәю өчен 19 җир кишәрлеге һәм корылма сатып алуга Татарстан бюджетыннан 128 млн сум бүлеп бирелгән. Бүгенге көндә барлык сатып алу процедуралары төгәлләнгән.

Казан Мэры Илсур Метшин бүген эшлекле дүшәмбедә билгеләп үткәнчә, алда күләмле эшләр көтә. «Максатка таба хәрәкәт һәрвакытта да тиз булмый. Хәтта ремонт та зур түгел кебек, әмма ул «Салават күпере»ндә яшәүчеләр өчен бик мөһим булган юл участогы зур әзерлек эшләре – челтәрләрне чыгару, реконструкция зонасына эләккән территория хуҗаларыннан сатып алу белән бәйләнгән. Бүгенге көндә без финиш турысында һәм мондый проектлар якындагы микрорайоннарда яшәүчеләргә транспорт хезмәте күрсәтүне яхшыртыр дип өметләнәбез», – диде Мэр һәм Казан Башкарма комитетына бу эшне контрольдә тотарга кушты.

Осиново урамындагы реконструкция «Салават күпере» микрорайонында яшәүчеләрнең саны артуга бәйле рәвештә кирәк, дип билгеләп үтте Казан Башкарма комитеты җитәкчесе урынбасары Игорь Куляжев. Ул Киров районында 2014 елда ТР Президенты ярдәме белән зур торак комплекс төзелеше башлануын искәртте. Бүгенге көндә микрорайон территориясендә 12 мең 711 фатирлы 45 йорт файдалануга тапшырылган, быел 1954 фатирлы 12 йорт файдалануга тапшыру планлаштырыла.

«2020 елда Главтатдортранс заказы буенча Осиново урамын торак комплексыннан Горький Шоссесына кадәр киңәйтү буенча проект-смета документациясе эшләнде, ул дәүләт экспертизасының уңай бәяләмәсен алды. Автомобиль юлларын агымдагы бәяләр дәрәҗәсендә реконструкцияләү бәясе 1,22 миллиард сум тәшкил итә», – дип сөйләде И.Куляжев. Бу акчаны республика бюджетыннан җәлеп итү планлаштырыла.