Казан зооботаника бакчасында лемур Мартаның баласы туган

Беренче берничә айда ана җәнлек баласын – корсагында, аннары аркасында йөртәчәк.

Фото: Казан зооботаника бакчасының матбугат хезмәте

(Казан шәһәре KZN.RU, 5 нче май). «Замбези елгасы. Африка» Казан зооботаника бакчасында 17 нче апрельдә лемур Марта бәбиләгән. Баланың җенесе әлегә билгесез, тугач ук әнисенең йоннарына ябышкан һәм һәрвакыт аның өстендә эленеп тора икән.

Ана җәнлек белән баласы кешеләр янына да бергә чыга. Марта беренче берничә ай дәвамында баласын корсагында йөртәчәк, соңрак ул аның аркасына күчәчәк. Биш айга кадәр кечкенә лемур сөт белән тукланачак.

Марта – тәҗрибәле һәм бик кайгыртучан ана. Моңа кадәр дә аның балалары булган: 2021 елда бер бала, ә 2022 елда игезәк бала тапкан, дип хәбәр итә Казан зооботаника бакчасының матбугат хезмәте.

Шулай ук укыгыз

Барлык яңалыклар