Казанның Ямашев проспекты буйлап җир асты кичүләрен тәртипкә китерәләр

Эшчеләр диварларны граффитидан чистарталар, култыксаларны, асфальт түшәмәне һәм башкаларны яңарталар

Казанның Ямашев проспекты буйлап урнашкан җир асты кичүләрен төзекләндерәләр. Белгечләр район администрациясе һәм Тышкы төзекләндерү комитеты җитәкчеләренең карап йөрү нәтиҗәсендә ачыкланган җитешсезлекләрне хәл итәләр.

Мусин урамындагы кичүдә яктырткычлар яңартылды, яңгыр рәшәткәләре һәм култыксалар ремонтланды. «Ак Барс Арена»ның яңгыр сулары лотоклары торгызылган, диварлар граффитидан, шулай ук плитә һәм пандус зонасы чистартылган. Моннан тыш, керү урынындагы җимерек җирне төзәттеләр һәм буяу эшләре алып барыла.

Әмирхан проспектында һәм Гаврилов урамында култыксаларны, плитәләрне, баскычларны һәм керү өлешләрен ремонтлау дәвам итә. Адоратский урамында шулай ук култыксалар һәм кичү урынында асфальт түшәмә яңартылган. Су спорт төрләре сарае янындагы кичүдә яңгыр кабул итү рәшәткәләре һәм баскычлардагы плитәләр төзәтелгән, дип хәбәр итә шәһәрнең Тышкы төзекләндерү комитеты матбугат хезмәте.

Шулай ук укыгыз

Барлык яңалыклар