Изге Гурийның чын таягы Казан епархиясе музееның үзәк экспонаты булачак

Күргәзмәне ачу тантанасын Казан һәм Татарстан митрополиты Кирилл җитәкләячәк.

Фото: Денис Гордийко

(Казан шәһәре KZN.RU, 19 нчы июль). 20 нче июльдә Казан Богородица монастыренда Казан епархиясе музее ачыла. Изге Гурийның, Казан епархиясенең беренче архиепискобының чын таягы экспозициянең үзәге булачак.

Музейны ачу Казан Митрополиясе оешуга 10 ел һәм Казан Мәрьям Ана иконасына 443 ел тулуга багышланган. Тантананы Казан һәм Татарстан митрополиты Кирилл җитәкләячәк, дип хәбәр итә ТР Мәдәният министрлыгының матбугат хезмәте.

Музейда Урта Идел буендагы христианнарның VII-XX гасырдагы яшәеше турында сөйли торган предметлар һәм коллекцияләр тәкъдим ителәчәк. Экспозициягә чиркәү киемнәре, гыйбадәт утваре, XVIII-XIX гасыр китаплары, чиркәү-славян, керәшен һәм удмурт телләрендәге XX гасыр кулъязма басмасы, XX гасыр куылулары шартларында дин тотучыларның рухи каршылыгы турында сөйләүче предметлар кертелгән. Изге Гурий таягыннан тыш, күргәзмәдә митрополит Серафим, митрополит Серапионның шәхси әйберләрен һәм башка кыйммәтле экспонатларны күрергә мөмкин булачак.

Музей экспозициясен булдыруда А.С.Пушкин исемендәге мәдәни үзәк, Казан керәшеннәренең иҗтимагый оешмалары, Кукмара районы Балды-Кнә авылының удмурт көнкүреше музее катнашкан.

Музей ачылышы 14:00 сәгатьтә Большая Красная ур., 5 адресы буенча булачак.

Шулай ук укыгыз

Барлык яңалыклар