Цифрлы телевидениегә кушылырга казанлыларга 70 волонтер ярдәм итәчәк

Апрель аенда Казанда цифрлы телевидение кабул итү өчен куллану җиһазларын урнаштыру буенча укыту курслары башлана.

(Казан шәһәре KZN.RU, 28-нче февраль, Алена Мирошниченко). Апрель аенда Казанда цифрлы телевидение кабул итү өчен куллану җиһазларын урнаштыру буенча волонтерлар өчен укыту курслары башлана. Укуларны 70 кеше үтәчәк, алар соңыннан җирле халык белән аңлату эшләре алып барачак.

"Россия телевидение радиотапшырулар челтәре" федераль дәүләт унитар предприятиесе тарафыннан эшләнгән 4 сәгатьлек уку программасы волонтерлар тарафыннан теоретик һәм гамәли белемнәр алуны күздә тота. Курс ахырында һәр волонтерга цифрлы телевидениене тоташтыруда халыкка ярдәм күрсәтү хокукын бирүче махсус таныклык бирелә.

ТР Мәгълүматлаштыру һәм элемтә министрлыгы матбугат хезмәтеннән хәбәр итүләренчә, Казан волонтерларының беренче төркемнәрен укыту 11 апрельгә планлаштырылган, икенчесе – 16 апрельгә, өченчесе - 18 апрельгә. Эш процессына җәлеп ителгән волонтерлар саны артырга мөмкин.

Татарстанлылар волонтерлар ярдәме белән апрель аенда эшли башлаячак цифрлы телевидениегә күчү буенча Республика элемтә үзәге аша яки хәзер үк телефон номеры буенча бердәм мәгълүмат үзәге аша мөрәҗәгать итә алачак: 8(800) 220-20-02.

Белешмә

Исегезгә төшерәбез, 3 июньдә Татарстанга цифрлы телевидениегә тулы масштаблы күчү туры киләчәк, аның кысаларында аналог эфир телетапшыруы туктатылачак. "Цифрга" күчү белән илнең һәм республиканың барлык халкына югары цифрлы сыйфатта 20 бушлай телеканал тәкъдим ителәчәк.

Башта телетапшырулар форматын тикшерергә кирәк. "Первый", "Россия 1", "НТВ", "5 Канал" телеканаллары логотиплары янында телевизор экранында "А" хәрефе урнашкан. Әгәр телевизор DVB-Т2 цифрлы стандартны кабкл итә икән, аны яңадан көйләргә һәм дециметрлы яки дулкынлы антеннага тоташтырырга кирәк. Әгәр телевизор кирәкле цифрлы стандартка туры килмәсә, антеннадан тыш, махсус приставка кирәк булачак. Цифрлы стандартлы приставканы теләсә кайсы көнкүреш техникасы һәм электроника кибетендә сатып алырга мөмкин, ә тиздән алар почта элемтәсенең барлык бүлекләрендә дә сатуда барлыкка киләчәк.

DVB-Т2 цифрлы стандартка туры килү-килмәүне берничә ысул белән ачыкларга мөмкин: җайланма паспортында карарга, телевизор маркасын һәм характеристикасын интернетта карарга яки җитештерүчегә ярдәм итү үзәгендә ачыкларга. Шунысын да билгеләп үтәргә кирәк, DVB-T стандартын гына кабул иткән телевизорлар һәм приставкалар цифрлы сигнал кабул итә алмый. Бу очракта приставканың заманча моделен - DVB-Т2 сатып алырга туры киләчәк

Цифрлы эфир телевидениесенә күчү кабельле телевидениенең, IP телевидение, спутник телевидениесенең түләүле челтәрләренә тоташтырылган абонентларга кагылмаячак.

Шулай ук укыгыз

Барлык яңалыклар