Казан Сабан туенда 200 меңгә якын кеше катнашкан

Сабантуйда өстәмә тикшерү-оператив төркемнәр, тоткарланучылар белән эшләү һәм югалган гражданнарны эзләү буенча төркемнәр төзелгән.

(Казан шәһәре KZN.RU, 24-нче июнь, Алена Мирошниченко). Кичә Казанда узган Сабантуйның дүрт мәйданчыгында 196 меңләп кеше булды, дип хәбәр итте эшлекле дүшәмбе вакытында шәһәр Эчке эшләр идарәсе башлыгы урынбасары Валерий Саматошенков. Казан Башкарма комитеты җитәкчесе Денис Калинкин Тынычлыктагы Каенлык мәйданчыгына керү вакытын чикләү этеш-төртешнең югары куркынычы белән бәйле булуын җиткерде һәм бәйрәмгә эләгү өчен көтәргә туры килгән кешеләр алдында гафу үтенде.

Валерий Саматошенков, гадәттән тыш хәлләр булмасын өчен, Сабантуй мәйданнарында полиция хезмәткәрләренең эшен оператив-профилактик чаралар сериясе алдан планлаштыруы турында сөйләде. Өстәмә тикшерү-оператив төркемнәр, тоткарланучылар белән эшләү һәм югалган гражданнарны, шул исәптән балигъ булмаганнарны эзләү буенча төркемнәр төзелде, диде В.Саматошенков.

«23-нче июньдә Казан полициясе көчәйтелгән режимда хезмәт итте. Бәйрәм башланыр алдыннан барлык мәйданчыклар һәм тирә-юнь территорияләре шартлаткыч матдәләрне эзләүче махсус өйрәтелгән хезмәт этләре булган белгеч-кинологлар тарафыннан тикшерелде. Юл хәрәкәтен җайга салу өчен ЮХИДИ постлары куелды. Тулаем алганда, ТР буенча Эчке эшләр министрлыгы һәм башка җаваплы министрлыклар һәм ведомстволар белән берлектә бәйрәм вакытында хокук тәртибен тәэмин итү мәсьәләләрен хәл итү өчен барлык кирәкле чаралар күрелде. Җәмәгать тәртибен һәм куркынычсызлык кагыйдәләрен тупас бозуларга юл куелмады», - дип хәбәр итте спикер.

Казан Башкарма комитеты җитәкчесе Денис Калинкин, шәһәр Эчке эшләр идарәсе башлыгы урынбасарыннан мәгълүмат тыңлаганнан соң, Татарстан Президенты Рөстәм Миңнехановка республика башкаласында 4 мәйданчык оештыру мөмкинлеге өчен рәхмәт белдерде. «Узган ел Сабантуй Киров районына әйләнеп кайтты, быел – Совет районына, Дәрвишләргә. Республика авыл хезмәтчәннәренә ишегаллары һәм үз мәйданчыкларында казанлылар өчен оештырган бәйрәм уңаеннан рәхмәт әйтәсем килә», - диде ул.

Хәер, халык өчен оештырылган күңел ачу урыннары саны узган ел белән чагыштырганда артса да, һәр почмак тамашачы белән тулы иде. Д.Калинкин сүзләренчә, Тынычлык бистәсендәге Каенлыкта кунаклар агымы шундый зур булган ки, билгеле бер вакытта куркынычсызлык максатларында мәйданчыкка керүне вакытлыча туктатып торырга туры килгән. «Бәйрәмгә керү өчен күпмедер вакыт көтәргә туры килгән кешеләрдән гафу үтенәм, амфитеатр шыгрым тулы иде. Тамашачылар хәтта юлларда да күп иде, этеш-төртеш куркынычы бик югары булды. Бу - безнең өчен әлеге ситуацияне өстәмә анализлау һәм киләчәктә кабатланмасын өчен карар табу өчен сәбәп», - дип нәтиҗә ясады Башкарма комитет башлыгы. Ул шулай ук территорияләрендә бәйрәм оештырылган район башлыкларына участокларны тәртипкә китерү бурычын йөкләде. Д.Калинкин билгеләп үткәнчә, бәйрәм рекреацион зоналарда үткәнлектән, аларны оператив рәвештә башлангыч рәвешенә китерергә кирәк.