2010 елгы халык санын алу мәгълүматлары буенча Казанда 15 яшьтән 29 яшькә кадәрге 300 мең кеше яшәгән

11 ел элек үзләрен никахта торучылар дип Казан ир-атларының 60%-ы һәм хатын-кызларның 47%-ы атаган.

Фото: Денис Гордийко

(Казан шәһәре KZN.RU, 12-нче март). 10 ел эчендә – 2010 елдан 2020 елга кадәр – Казанда яшәүчеләр саны 113,9 мең кешегә арткан. 2010 елгы халык санын алу мәгълүматлары буенча, казанлылар саны 1143,5 мең тәшкил иткән, 2020 елның 1 гыйнварына – 1257,4 мең кеше.

2010 елгы халык санын алу мәгълүматларына таянсак, Казанда ул чорда 508,4 мең ир-ат һәм 635,1 мең хатын-кыз яшәгән. Шул ук вакытта ун ел элек ТР башкаласында һәр мең кызга 916 яшь кеше туры килгән – 15 яшьтән 29 яшькә кадәрге яшь категориясендә ир-атлар саны 143,3 мең кеше тәшкил иткән, хатын-кызлар саны – 156,4 мең. 2010 елгы халык санын алу нәтиҗәләре буенча, ТР башкаласында 299,7 меңгә якын кыз һәм егет яшәгән.

Шунысы игътибарга лаек, 2010 елгы халык санын алу мәгълүматлары буенча, үзләрен никахта торучылар дип Казан ир-атларының 60%-ы һәм хатын-кызларның 47%-ы атаган. Шулай итеп, сораштырылган һәр бер мең ир-атка өйләнешүчеләрнең 609-ы туры килгән, 539 – теркәлгән никахта, 70 – теркәлмәгән килеш. Беркайчан да никахта тормаулары турында 288 респондент хәбәр иткән (һәр бер меңгә), рәсми аерылышучылар (яки бергә тормаучылар) – 69, тол калган 34 кеше.

Әлеге сорауга Казанда яшәүче хатын-кызлар башкачарак җавап биргән. Сораштыруда катнашкан һәр бер мең хатын-кызның 469–ы никахта торуын җиткергән (теркәлгән никахта – 416, теркәлмәгән никахта – 53). 236 хатын-кыз беркайчан да никахта тормаганлыгын хәбәр иткән, рәсми рәвештә аерылышучылар саны (яки аерым торучылар) – 120. Сораштырылган һәр мең хатын-кызның 175-е үзен толлар рәтенә керткән.

Быелгы сан алу ил тарихында уникенче булачак һәм яңа – цифрлы форматта узачак. Алдагы исәпкә алуның төп яңалыгы Россия халкы тарафыннан РФ дәүләт хезмәтләре порталында электрон исәп алу кәгазен мөстәкыйль тутыру мөмкинлеге булачак, дип искә төшерә Татарстанстатта.

Сүз уңаеннан, 2020 елның октябрендә Бөтенроссия җәмәгатьчелек фикерен өйрәнү үзәге үткәргән сораштыру күрсәткәнчә, сораштырылганнарның 43%-ы читтән торып язылу мөмкинлеге белән кызыксына – дәүләт хезмәтләре порталы аша. Респондентлар мондый өстенлек бирүнең төп сәбәпләре дип уңайлылыкны, физик, эпидемиологик һәм мәгълүмати куркынычсызлыкны атады. Шуңа да карамастан, исәпкә алучылар һәр фатирны һәм һәр йортны йөреп чыгачак. Торак йортлар буенча йөргәндә, исәпкә алучылар махсус программалы планшетлар кулланачак. Шулай ук стационар участокларда, шул исәптән «Минем документлар» дәүләт һәм муниципаль хезмәтләр күрсәтү буенча күп функцияле үзәкләр биналарында да теркәлергә мөмкин булачак.

Казандагы Дәүләт статистикасы бүлегендә искә төшергәнчә, исәпкә алу кәгазе сорауларының күпчелек өлеше традицион һәм кешенең үзенә - яшенә, җенесенә, белем дәрәҗәсенә, гаилә хәленә, яшәү өчен акча чыганакларына багышланган. Өчтән бер өлешне гражданнарның яшәү шартлары турындагы сораулар алып тора.

Бөтенроссия халык санын алуның исәпкә алу битләре тулысынча аноним булачак, аларда бернинди персональ мәгълүмат булмаячак. Мәгълүматлар җыюның төп принцибы – үзбилгеләнү – барлык җавапларны исәпкә алу кәгазьләренә респондентлар сүзләреннән язачаклар. Бернинди раслаучы документлар да кирәк булмаячак.

Шулай ук укыгыз

Барлык яңалыклар