Инна Чурикованың күлмәге һәм Евгений Леоновның китабы Казанның социалистик көнкүреш музее коллекциясен тулыландырды

Танылган актерларның шәхси әйберләрен Николай Караченцовка багышланган экспозициядә күрергә мөмкин.

Фото: Казанның социалистик көнкүреш музее

(Казан шәһәре KZN.RU, 26-нчы март). Казанның социалистик көнкүреш музее коллекциясе яңа экспонатлар белән тулыландырылды. Танылган актерлар Инна Чурикова һәм Евгений Леоновның шәхси әйберләрен «Николай Караченцов. Тормыш һәм язмыш» экспозициясендә күрергә мөмкин.

Музей директоры Рөстәм Вәлиәхмәтов сөйләгәнчә, Инна Чурикова һәм Евгений Леонов Николай Караченцовның якын дуслары булган.

Шулай ук музейга килүчеләр модельер Слава Зайцевның күлмәген күрә алачак, ул СССРның халык артисты Инна Чуриковага махсус тегелгән. Бу күлмәктә ул «Ленком» театрының «Сорри» спектаклендә Николай Караченцов белән бергә уйнаган. Күлмәк театрның костюмнар бүлмәсендә кадерләп сакланган. Инна Чурикова шәхсән үзе театр җитәкчелегеннән күлмәкне актер Николай Караченцовка багышланган күргәзмә өчен Казанга җибәрүен сораган. СССР халык артисты Евгений Леоновның гаиләсе Татарстан башкаласына аның «Улына хат» китабын җибәрде.

Исегезгә төшерәбез, күргәзмә 19-нчы мартта Казан Башкарма комитетының Мәдәният идарәсе ярдәмендә ачылды.

Шулай ук укыгыз

Барлык яңалыклар