Россия Пенсия фонды: 1 нче майдан 8-17 яшьләрдәге балалы гаиләләргә яңа пособиеләр түләүгә гаризалар кабул ителә башлый

Алар түбән керемле гаиләләргә биреләчәк.

Фото: Денис Гордийко

(Казан шәһәре KZN.RU, 6 нчы апрель). 1 нче майдан 8-17 яшьлек балалар тәрбияләүче гаиләләргә яңа пособиеләр түләүгә гаризалар кабул ителә башлый. Алар бер кешегә уртача керем төбәктәге яшәү минимумыннан кимрәк булган түбән керемле гаиләләргә биреләчәк.

Түләү күләме гаиләнең кеременә бәйле, ул төбәктәге балага яшәү минимумының 50%, 75% яки 100% тәшкил итәргә мөмкин. База күләме – 50%, ил буенча уртача түләү суммасы 6 мең 150 сум тәшкил итәчәк. Бу түләүне исәпкә алып, гаиләнең кереме айга бер кешегә яшәү минимумыннан кимрәк булса, пособие бала өчен төбәк яшәү минимумының 75% күләмендә билгеләнәчәк. Бу түләүне исәпкә алып, гаиләнең җан башына уртача кереме яшәү минимумыннан кимрәк булса, балага төбәктәге яшәү минимумының 100% күләмендә максималь пособие билгеләячәкләр, дип хәбәр итә Россия Пенсия фондының ТР буенча бүлеге матбугат хезмәте.

Билгеләп үтәбез, пособиене 1 нче апрельдән билгеләячәкләр. 1 нче майдан соң гариза биреп, гаилә апрель һәм май айлары өчен акча ала алачак, әмма апрель аенда балага 8 яшь тулган булырга тиеш.

Искәртеп узабыз, хәзер 8 яшьтән 17 яшькә кадәрге балалар өчен түләүне ялгыз ата-аналар гына рәсмиләштерә ала, пособиенең күләме бала өчен төбәктәге яшәү минимумының 50% ын тәшкил итә. Шулай итеп, май аеннан түбән керемле тулы гаиләләр дә акча ала алачак.

3 яшьтән алып 7 яшькә кадәр балалары булган гаиләләр айлык акчалата ярдәмне 10 мең 433 сумга кадәр алырга мөмкин.

Яңа пособие белән беррәттән, җан башына уртача керем бер кешегә яшәү минимумыннан артмаган Татарстан гаиләләре өч яшьтән алып җиде яшькә кадәр балага айлык түләү ала ала. Исегезгә төшерәбез, әлеге түләү Россия Президентының 2020 елның 20 нче мартындагы указы белән каралган.

Татарстан Республикасы Хезмәт, халыкны эш белән тәэмин итү һәм социаль яклау министрлыгында аңлатуларынча, пособие күләме гаилә керемнәренә бәйле һәм 50% (яки 5216,5 сум), 75% (яки 7824,75 сум) яки 100% (10 мең 433сум) Татарстанда билгеләнгән яшәү минимумы күләменнән тора. Ай саен бер кешегә уртача керем яшәү минимумына җитмәсә, пособиенең күләме арта.

Гаиләнең җан башына уртача кереме соңгы 12 календарь айда гаилә әгъзаларының керемнәре суммасыннан чыгып, хисап чорында гаиләнең барлык әгъзаларының керемнәренең уникенче суммасын гаилә әгъзалары санына бүлү юлы белән исәпләнә.

Түләүне РФ гражданлыгы булган һәм ил территориясендә яшәүче балаларның ата-аналары яисә законлы вәкилләре ала ала. Түләү гаиләдә 3 яшьтән 7 яшькә кадәр һәр балага билгеләнә.

Пособие алу өчен гаризаны РФ дәүләт хезмәтләре порталы, яшәү урыны буенча Республика матди ярдәм үзәге бүлеге яки КФҮ аша бирергә мөмкин.

Шулай ук укыгыз

Барлык яңалыклар