Бүген Петр Налич Горький исемендәге паркта «Итиль» фестивалендә чыгыш ясаячак

Шәһәр халкын һәм кунакларны ярминкә, фуд-корт, мастер-класслар белән балалар зонасы һәм лекторийлар көтә

Бүген Горький паркында «Итиль» Идел буе халыкларының яңа этник мәдәнияте фестивале узачак. Кичәнең хедлайнеры җырчы һәм композитор Петр Налич булачак.

Фестивальнең концерт программасын 12:00 сәгатьтә хард-рок, гранж һәм башка музыка стильләрен берләштерүче «Ялар» чуваш төркеме ачачак. 12:40 та сәхнәгә Urtic проекты белән Казан музыканты Дима Крапивин чыгачак. Ул үзенчәлекле, күп төрле жанрлы, электрон композицияләр башкарачак.

Чара 13:20 дә Иннополистан «Тамай» төркеменең рок-спектакле фрагменты белән дәвам итәчәк. 13:55 тә сәхнәдә «Дышать» җырлаячак, җырчы үзенең иҗатында Көнчыгыш һәм Көнбатыш мәдәниятләрен инди-поп һәм хип-хоп элементлары белән берләштерә.

Халык музыкасына яңа карашны 14:25 сәгатьтә Башкортстаннан Y.U.R.T.A. төркеме тәкъдим итәчәк. Шулай ук әлеге республикадан 15:10 да электрон музыканы халык көйләре һәм танылган башкорт һәм татар җырлары белән берләштергән HANQYZY җырчысы чыгыш ясаячак.

Омск өлкәсеннән «Хмурка» төркеме 15:40 сәгатьтә туган якның борынгы җырларын башкарачак, ә Zakaria төркеме солисткалары 16:15 сәгатьтә Татарстан халыкларының җиде телендә җырлаячак. Удмуртияне җырчы Лади Свети 16:50 дә, ә Мордовияне Влада Горькова 17:25 тә тәкъдим итәчәк.

18:00 сәгатьтә сәхнәгә үз иҗатында романслар һәм чегән балладалары белән халык мотивларын берләштерүче «Кружево» проектының Казан музыкантлары чыгачак. Музыкада фольклор һәм мифологик сурәтләрне Кырымнан 18:40 сәгатьтә «Эді» төркеме тәкъдим итәчәк. Инди-фолк һәм рок-музыканың кушылуын 19:50 дә Мәскәү җырчысы Васса Железнова күрсәтәчәк.

Фестивальнең хедлайнеры — Петр Налич — сәхнәгә 21:00 дә чыгачак.

Идел буе халыкларының яңа этник мәдәнияте «Итиль» фестивалендә шулай ук ярминкә, фуд-корт, мастер-класслар белән балалар зонасы һәм лекторийлар оештырылачак. Шөгыльләнү мәйданчыклрында шәһәр халкын һәм кунакларны беләзек үрергә, брелоклар һәм «Зилант» мини-панносы ясарга өйрәтәчәкләр.

13:00 тә килүчеләргә борынгы инструмент — домраның заманча яңгырашы турында сөйләячәкләр. 14:30 да фестивальдә катнашучылар белән түгәрәк өстәл узачак. Ә 16:30 сәгатьтә «Моң. Аңлатма» документаль фильмын күрсәтү һәм аның режиссеры Рәдиф Кашапов белән фикер алышу планлаштырылган, дип хәбәр иттеләр шәһәрнең Парклар һәм скверлар дирекциясендә.

Шулай ук укыгыз

Барлык яңалыклар