Казанда суны туктатып тору: Волжский су алу җайланмасында эшермәне сүтә башладылар

Эшләр барышын Торак-коммуналь хуҗалыгы комитеты һәм «Водоканал» муниципаль унитар предприятиесе контрольдә тота.

(Казан шәһәре KZN.RU, 28-нче сентябрь). 27-нче сентябрьдә 22.00 сәгатьтә Казанда Волжский су алу җайланмасында бик арматурасын планнан тыш төзекләндерү эшләре башланды. Эшләр барышын Торак-коммуналь хуҗалыгы комитеты рәисе Дмитрий Анисимов һәм «Водоканал» муниципаль унитар предприятиесе генераль директоры Андрей Егоров контрольдә тота.

Эшләр 1200 мм диаметрлы эшермә ябылганнан соң 22.00 сәгатьтә старт алды, Волжский су алу җайланмасының 1-нче, 2-нче, 3-нче һәм 4-нче чиратларының сүндерелүе башланды. 22.30 сәгатьтә торбаларны судан арындырып тору эшләре башланды - челтәрләрдә су җибәрү 28-нче сентябрьнең 5.00 сәгатенә кадәр дәвам итте.

Иртәнге 5-тән 1000 мм диаметрлы төзек булмаган эшермәне сүтү белән бәйле эшләр башланды: ныгытманы кисү, капкачларны демонтажлау, корпусны кисү. 8.30 сәгатьтә «Водоканал» хезмәткәрләре эшермәне демонтажлауга ук керешкәннәр, аның корпусында ярыклар табылган иде.

Хәзерге вакытта барлык эшләр график буенча бара, өзеклекләрсез, дип хәбәр иттеләр «Водоканал» муниципаль унитар предприятиесендә.

Шуны да искәртик: төзекләндерү эшләре белән бәйле рәвештә 30 сәгатькә Авиатөзелеш, Киров, Мәскәү һәм Яңа Савин районнарындагы йортларның бер өлешендә су белән тәэмин итү туктатылган иде. Бүген сәгать 6.00-дан 23.00-гә кадәр су тутырылган цистерналар-автовозкалар йөриячәк. Су белән тәэмин итү 29-нчы сентябрь иртәсендә торгызылыр дип планлаштырыла.