2,5 меңгә якын кеше Казанда Бөтенроссия Сбербанкиадасында катнаша

Ярышларны ачуда Герман Греф, Рөстәм Миңнеханов һәм Илсур Метшин катнашты

Фото: ТР Рәисе матбугат хезмәте

(Казан шәһәре KZN.RU, 11 нче июль). Кичә Казанның «Баскет-холл»ында компания хезмәткәрләренең төп спорт турниры – XIV Бөтенроссия җәйге Сбербанкиадасы старт алды. Ярышлар 18 командадан 2,5 мең катнашучыны берләштерә. Турнирны ачу тантанасында ТР Рәисе Рөстәм Миңнеханов, «Сбербанк» ААҖ президенты һәм идарә рәисе Герман Греф һәм Казан Мэры Илсур Метшин катнашты.

Ярышлар Казанда 10-14 нче июльдә узачак. Аларда спортның 10 төрендә иң яхшы спортчыларны билгеләячәкләр. Өч көн эчендә 49 комплект бүләк уйнатылачак.

Герман Греф Татарстанга кунакчыллыгы өчен рәхмәт белдерде һәм Сбербанкиаданың 4 ел үткәрелмәвен искәртте. «Минемчә, кешеләр аралашуны, спортны һәм бәйрәмне бик сагындылар. Барыбызга да бер генә нәрсә көтәргә кирәк: илебезнең иң төп компанияләренең берсенең командасы көчлерәк, бердәмрәк булуын, яңа бурычларга, биеклекләргә, сынауларга әзер булачагын. Бу – иң мөһим нәтиҗә, аңа ирешергә мөмкин», - диде ул.

Рөстәм Миңнеханов ассызыклаганча, Сбербанк – Татарстанның стратегик партнеры, һәм республика өчен турнирны кабул итү зур хөрмәт. «Без Сбербанк командасының бердәм корпоратив рухы барлыгын, аларның ничек динамик үсеш алуын күрәбез. Мин сезгә чәчәк атуыгызны, спорт уңышлары һәм Казанда рәхәт булуын телим», - диде ТР Рәисе.

Турнирны ачуда шулай ук республиканың Дәүләт Киңәшчесе Минтимер Шәймиев һәм Россия Хоккей федерациясе президенты Владислав Третьяк катнашты.

Тантана алдыннан Рөстәм Миңнеханов, Герман Греф һәм Илсур Метшин Бәшир Рәмиев исемендәге ИТ-паркта булдылар. Идарә рәисе технопаркның мөмкинлекләре белән танышты һәм аның инфраструктурасын бәяләде. Шулай ук Герман Греф узган ел ачылган Сберның ИТ-белгечләре өчен технохабка да барды. Биредә корпорациянең төп продуктларын һәм хезмәтләрен эшләү буенча белгечләр эшли. ИТ-паркта ТР Рәисе һәм Идарә рәисе хезмәттәшлекне алга таба үстерү һәм перспектив проектларны гамәлгә ашыру турында фикер алыштылар, дип хәбәр итә төбәк башлыгының матбугат хезмәте.

Видеорепортаж

Шулай ук укыгыз

Барлык яңалыклар