Авиатөзелеш һәм Яңа Савин районнары предприятиеләре әйләнеше 176 млрд сум тәшкил иткән

Бер ел эчендә бу районнарда шәхси эшмәкәрләр саны 16% ка, ә үзмәшгульләр 27% ка арткан

Фото: Марат Мөгыйнов

Авиатөзелеш һәм Яңа Савин районнары узган елда икътисадый үсешнең уңай якка үзгәрешен күрсәттеләр. Уртача хезмәт хакы 27% ка арткан, ә сәнәгать җитештерүе индексы 156% тәшкил иткән. Бу хакта аппарат киңәшмәсендә Авиатөзелеш һәм Яңа Савин районнары администрациясе башлыгы Ренат Шәмсетдинов хәбәр итте.

«Авиатөзелеш районы – сәнәгать районы. Саннар үзләре үк сөйли: предприятиеләр әйләнеше 176 млрд сум тәшкил иткән, салым түләүләре 12% ка арткан. Бу 19 млрд сумга якын. Һәм иң мөһиме – хезмәт хакы 27% ка арткан», – дип билгеләп үтте районнарның мөһим икътисадый казанышларын Казан мэры Илсур Метшин.

Докладчы хәбәр иткәнчә, районнарда сәнәгать үсеше дәрәҗәсе сизелерлек арткан: сәнәгать өлкәсендә җитештерү индексы 156% тәшкил иткән. Предприятиеләр 176 млрд сум күләмендә гомуми керем алган, ә чиста табыш күләме 6,5 млрд сумга җиткән. Түләнгән салымнар суммасы 19 млрд сумнан артып киткән.

Предприятиеләрнең сәнәгать әйләнеше арту белән хезмәткәрләрнең уртача айлык хезмәт хакы да 27% ка артты.

Сәнәгать җитештерүе үсү белән бергә кече һәм урта бизнес предприятиеләренең саны артуы күзәтелә. Районнарда шәхси эшмәкәрләр 16% ка, ә үзмәшгульләр 27% ка арткан.

Ренат Шәмсетдинов хезмәт хакы буенча бурычларны бетерүне тагын бер мөһим казаныш дип атады. Максатчан эш нәтиҗәсендә узган ел 9,2 млн сумлык бурыч бетерелде.

Эшмәкәрлек мәсьәләләре буенча Координация советы хакимият һәм бизнес арасындагы хезмәттәшлек өчен мөһим мәйданчыкка әверелде. Ул эре һәм урта бизнес вәкилләрен, төрле дәрәҗәдәге депутатларны берләштерә. Нәкъ менә монда район икътисадының нәтиҗәлелеген күтәрүгә юнәлдерелгән мөһим идарә карарлары кабул ителә.

Район администрациясе тарафыннан эре эш бирүчеләр белән берлектә оештырылган предприятиеләрнең беренче спартакиадасы күп кенә компанияләрнең хезмәткәрләрен җәлеп итте. Мондый чаралар хезмәттәшлек рухын ныгытуга һәм төрле оешмалар хезмәткәрләре арасында дустанә элемтәләрне үстерүгә ярдәм итә.

«Администрация һәм яңа идеяләр исәбенә сәнәгать предприятиеләре белән актив эшне кертергә була: эшмәкәрлекне үстерү буенча районның Координация советы һәм Сәнәгать предприятиеләре спартакиадасы. Бу тормышны бизәүче инициативалар», – диде Казан мэры.

Авиатөзелеш һәм Яңа Савин районнары администрациясе башлыгы шулай ук предприятиеләрнең үзләре генә түгел, ә эш эзләү ысулларының да яңартылуын билгеләп үтте. Ибраһимов урамында урнашкан кадрлар үзәген төзекләндерү узган елның төп проектларының берсе булды. Көн саен әлеге үзәк 200ләп кешене кабул итә, кулай эш табуда ярдәм күрсәтә.

«Махсус хәрби операциядә хәрби хезмәтне тәмамлаган гражданнарны, шулай ук аларның гаилә әгъзаларын эшкә урнаштыруга аерым игътибар бирелә», – дип йомгаклады Ренат Шәмсетдинов.