COVID-19 белән бәйле рәвештә, Татарстанда 22 ноябрьдән яңа чикләүләр кертү планлаштырыла

Җәмәгать транспортында йөрү өчен QR-код таләп ителәчәк, ә 60 яшьтән өлкәнрәк кешеләргә транспорт картасының гамәлдә булуын туктатып торачаклар.

Фото: Марат Мугинов

(Казан шәһәре KZN.RU, 6-нчы ноябрь). Бүген ТР Хөкүмәте Йортында узган киңәшмәдә ТР Президенты Рөстәм Миңнеханов Татарстанда 22-нче ноябрьдән гамәлгә кертү планлаштырыла торган яңа чикләү чаралары турында хәбәр итте.

Ул ассызыклаганча, республикада коронавирус буенча киеренке хәл саклана. Пандемия башланганнан бирле 32 меңгә якын авыру очрагы ачыкланган, COVID-19 диагнозы расланган 1041 кеше вафат булган. Бүгенге көндә коронавирустан вакцинаның беренче компонентын 1 млн 670 мең кеше ясаткан.

«Гомер – ул иң кыйммәтлесе. Бер гомерне саклап калу – инде зур казаныш. Бер кешене югалту да – безнең өчен бик зур фаҗига. Үз сәламәтлегеңне кайгыртырга, туганнарың, якыннарың, хезмәттәшләрең турында уйларга кирәк», – дип өстәде Татарстан Президенты.

22-нче ноябрьдән түбәндәге чикләү чараларын кертү планлаштырыла

QR-коды яисә медотвод турында белешмәсе булмаган 60 яшьтән өлкәнрәк затлар өчен транспорт карталарының гамәлдә булуы туктатыла;
18 яшьтән өлкәнрәк затлар җәмәгать транспортыннан бары тик QR-коды яисә медотвод турындагы белешмә булган очракта гына файдалана алачак;

медотвод турында белешмәнең электрон варианты формасы эшләнәчәк;

һөнәри белем бирү оешмаларына уку процессын 18 яшьтән өлкәнрәк затларга QR-код яки медотвод турында белешмә күрсәтеп, көндезге дәресләргә кертүне оештырырга тәкъдим ителде.

Татарстанда элек кертелгән эш көннәре режимы 7 ноябрьдән соң озайтылмаячак, әмма кайбер объектларның эшенә, тамаша-күңел ачу һәм массакүләм чаралар үткәрүгә карата катгый чикләүләр санитар-эпидемиологик хәл яхшырганчы гамәлдә булачак. Моннан тыш, 9-нчы ноябрьдән предприятие җитәкчеләренә беренче прививканы ясатмаган, медотволары булган яки соңгы 6 ай эчендә авырган затлардан тыш, хезмәткәрләрне эштән читләштерергә туры киләчәк, дип хәбәр итә республика башлыгының матбугат хезмәте.

Казанда вакцинациянең мобиль пунктларының эш графигы һәм адреслары махсус бүлеккә урнаштырылган. COVID-19 белән бәйле рәвештә профилактика, вакцинация, өлкән яшьтәге кешеләргә һәм эшкуарлыкка ярдәм итү мәсьәләләре буенча кайнар линия телефоннары монда күрсәтелгән. Моннан тыш, Казан пунктларында вакциналар булу турындагы мәгълүматлар белән Telegram-бот булдырылган.

Шулай ук укыгыз

Барлык яңалыклар