Казанда яңа мемориаль композицияне Шаляпин һәм Горькийга багышладылар

Ул шул ук исемдәге музей фасадында барлыкка килде

Фото: ТР Рәисе матбугат хезмәте

(Казан шәһәре KZN.RU, 6 нчы июнь). Казанда Федор Шаляпин һәм Максим Горькийга багышланган мемориаль композиция ачылды. Ул шул ук исемдәге музей фасадында барлыкка килде, аның экспозициясе опера җырчысы һәм язучының тормышы һәм иҗаты турында сөйли. Бу хакта ТР Рәисенең матбугат хезмәтендә хәбәр иттеләр.

Скульптор Иван Новоселов тарафыннан ясалган яшь Максим Горький бюсты музей фасадында 1967 елда барлыкка килә. Быел аның янында Федор Шаляпин бюсты, шулай ук скульптор Зөлфия Мөхәммәтьянованың «XIX һәм XX гасырлар чигендәге Казан күренешләре» чүкеп ясалган панносы урнаштырылган.

Композицияне ачу тантанасында ТР Рәисе Рөстәм Миңнеханов катнашты. Ул билгеләп үткәнчә, Горький һәм Шаляпин бер-берсен туганнар дип атыйлар, аларны сәнгатькә, Ватанга һәм халыкка мәхәббәт берләштерә.

«Казанда алар рухи үсеш алганнар һәм формалашканнар. Бүген әлеге ике талантлы кеше янә яраткан шәһәрләре фонында бергә», – диде төбәк башлыгы.

Исегезгә төшерәбез, быел язучы Максим Горькийның 155 еллыгы билгеләп үтелә. Чаралар Мәскәүдә, Түбән Новгородта һәм Казанда уза. Әйтик, ТР башкаласында «Горький+» сәнгать фестивале үтте. Шәһәрлеләр өчен концертлар, спектакльләр һәм перформанслар оештырылды.

Моннан тыш, быел опера җырчысы Федор Шаляпинның 150 еллыгы билгеләп үтелә. Бу уңайдан шәһәрдә чаралар циклы уза, алар арасында Пушкин урамындагы 10 нчы йорт (аның флигелендә Шаляпин туа) фасадында мемориаль такта ачылуы да бар. Гыйнвар аенда 41 нче Халыкара опера фестивале дә юбилейга багышланды. Моннан тыш, Качалов урамында урнашкан балалар музыка-хор мәктәбенә Федор Шаляпин исеме бирелде.

Шулай ук укыгыз

Барлык яңалыклар