Г.Камал исемендәге театрның яңа бинасы 1,3 мең урынга исәпләнгән

ТР Министрлар Кабинеты карарыннан күренгәнчә, объектның мәйданы 48 мең квадрат метрдан артык тәшкил итәчәк

Фото: Казан шәһәре KZN.RU

(Казан шәһәре KZN.RU, 7 нче декабрь). Г.Камал исемендәге театрның яңа бинасының гомуми мәйданы 48 мең 824 кв.м тәшкил итәчәк. Объект 1 370 урынга исәпләнгән. Мондый мәгълүматлар Татарстан Республикасы Министрлар Кабинетының Казан муниципаль берәмлеге документлар һәм хокукый актлар җыентыгында бастырылган карарында китерелгән.

Театрда дүрт зал җиһазландыру планлаштырыла. Зур зал – 788 урынга, көнчыгыш (түгәрәк) зал – 242 урынга, универсаль зал – 300 урынга, камера залы 40 урынга исәпләнгән булачак. Проект документлары нигезендә, учреждение хезмәткәрләренең гомуми саны 544 кеше тәшкил итәчәк.

Бинада биш-сигез кат, шул исәптән цоколь һәм зур сәхнәнең өске механика катлары булачак. Театр территориясен яшелләндерү мәйданы якынча 3 710 кв.м тәшкил итәчәк. Моннан тыш, мәдәният учреждениесенә килүчеләр өчен 140 парковка урыны каралган: 40 – театрның үз янында һәм 100 – муниципаль паркингларда.

«Проектлаштырыла торган театр бинасы өчен машина-урыннарның исәпләнгән саны 200 машина-урын тәшкил итәчәк, тарихи территориядә урнашу сәбәпле 30% тан тыш, – 140 машина-урын, шул исәптән халыкның аз хәрәкәтләнүче төркемнәре өчен 14 машина-урын», – диелә Татарстан Республикасы Министрлар кабинеты карары текстында.

Исегезгә төшерәбез, Камал театры өчен яңа бина концепциясен эшләүгә конкурс 2021 елда игълан ителде, аның катнашучылары 14 илдән 537 кеше булды. Эшләрне 26 консорциум һәм 13 индивидуаль конкурсант тәкъдим итте. Иң яхшысы дип «Ваухаус» ҖЧҖ (Мәскәү) җитәкчелегендәге консорциум проекты танылды, аның составына Япон фирмасы Kengo Kuma & Associates, немец компаниясе Werner Sobek AG һәм Казанның «Архитектор Бакулин Герман Алексеевичның персональ иҗади остаханәсе» оешмасы керде.

Шулай ук укыгыз

Барлык яңалыклар