Яңалыклар
15.11.2019, 14:00
Казанның Универсиада проспекты янындагы яңа парк зонасы шәһәрнең яшел каркасының бер өлеше булачак
Совет районы башлыгы Роман Фәтхетдинов «Любитель» коммерциягә нигезләнмәгән бакчачылык ширкәтендә яшәүче җирле халык һәм бакчачыларның инициативалы төркеменә планировка проектының асылы турында сөйләде.
(Казан шәһәре KZN.RU, 15-нче ноябрь). Казанда Универсиада проспекты буенча Даурия урамыннан Танк урамына кадәрге участокта җәяүлеләр һәм велоюллар булган яңа парк зонасын оештыру тәкъдим ителә. Совет районы башлыгы Роман Фәтхетдинов кичә район администрациясенә Даурия һәм Латыш Укчылары урамнарының йорт буенча өлкәннәрен, «Любитель» коммерциягә нигезләнмәгән бакчачылык ширкәте бакчачыларын һәм Танкодром микрорайонында яшәүчеләрнең инициатив төркемен чакырды. Ул ассызыклаганча, бу участокта яңа күпкатлы йортлар да, сәүдә объектлары да булмаячак. Очрашуда шулай ук Архитектура һәм шәһәр төзелеше идарәсе белгечләре дә катнашты.
Архитектура һәм шәһәр төзелеше идарәсе башлыгы урынбасары Анастасия Латыйпова төзекләндерелгән территория микрорайон өчен магистраль һәм торак йортлар арасында табигый яшел буфер булачак һәм яңартылган «Комсомолец» паркы белән кушылачак, дип сөйләде. Территорияне планлаштыру проекты җәяүлеләр һәм велосипед юллары буенда агач һәм куакларны каскадлы урнаштырып утыртуны күздә тота. Яңа иҗтимагый киңлек шәһәр халкы өчен уңайлы һәм комфортлы булачак һәм шәһәрнең яшел каркасының бер элементы булып торачак. Исегезгә төшерәбез, Генплан проекты нигезендә, Казанда 2040 елга, яңа парклар һәм скверлар, яр буйлары һәм бульварлар барлыкка килү, сәнәгать зоналарын регенерацияләү һәм иҗтимагый территорияләрне төзекләндерү хисабына, яшелләндерелгән территорияләр мәйданын 40%-ка – 12 мең гектарга кадәр арттыру планлаштырыла.
А.Латыйпова әлеге участокта бернинди төзелеш тә булмаячак – авышлыкта рекреация зонасы оештырылачак, дип ассызыклады. «Авышлыкның территориясе катлаулы һәм анда төзергә, бигрәк тә, проектлау, геодезия һәм геологик тикшеренүләр, проект алды эшләрен күздә тотмый торган стихияле төзелешләр алып барырга ярамый. Биредә тәртипсез төзелеш авышлыкның шуышуына китерергә мөмкин, бу куркыныч», - дип аңлатты Архитектура һәм шәһәр төзелеше идарәсе башлыгы урынбасары.
Даурия ур., 20а, Латыш укчылары ур., 27 адресы буенча урнашкан участокта территорияне планлаштыру проектында җәяүлеләр тротуарлары һәм велосипед юлы белән җирле әһәмияттәге урам булдыру күздә тотыла. Ул күпкатлы йортлар буенда инде булган юлларны бергә тоташтырачак. Универсиада проспектыннан транзит транспорт хәрәкәтен булдырмау өчен юл тупиклы булачак. Анастасия Латыйпова ассызыклап үтте: җирле халыкка биредә магистраль һәм транзит юллар барлыкка килүдән куркырга кирәкми. Яңа урам квартал эчендәге хәбәрләр өчен генә формалаша.
Территорияне төзекләндерү белән киләчәктә Универсиада Авылыннан Горки-Әмәт урманына – яңа парк, «Комсомолец» паркы, Мәүлетов урамы аша яшел территорияләр аркылы велосәяхәт элемтәсен оештыру мөмкинлеге барлыкка киләчәк. Велосәяхәт элемтәләре шулай ук «Әмәт» метро станциясенә һәм «Җиңү Проспекты» метро станциясенә – Парин урамындагы бульвар аша да алып барачаклар.
Шуның аркасында киләчәктә Горки һәм Танкодром эре торак массивлары янында урнашкан Универсиада Авылыннан шәһәр үзәгенә кадәр велосипед элемтәсе булачак, дип билгеләп үтте Казанның баш архитекторы урынбасары Тимур Кадыйров. Ул велоинфраструктура җитмәгән шәһәр халкыннан һәм велоактивистлардан бу темага сораулар күп килүен әйтте. Аерым алганда, бу хакта үз вузларына кадәр велосипедларда барырга теләгән студентлар сөйли.
Велоюлны Универсиада проспекты кырые буйлап, трасса буенча түгел, чөнки ул куркыныч тудыра, ә бәлки велосипедчылар яшел зона буйлап барсын өчен, аннан 11 м ераклыкта урнаштырырга тәкъдим ителә. 3,5 м киңлектәге велоюл ике яклы булыр һәм транзит һәм рекреацион файдалану өчен газон, куаклар һәм агачлар белән бүленер дип көтелә.
Хәзер Универсиада проспекты буенча авышлыкта «Любитель» коммерциягә нигезләнмәгән бакчачылык ширкәте урнашкан, ул ярты гасыр элек – 1957 елда төзелгән. Бүген 157 бакчаның яртысыннан артыгы (81) ташландык хәлдә, коймалар юк. Калган участоклар, нигездә, Латыш Укчылары урамы буенда урнашкан, аларда 43 корылма урнашкан, аларның яртысына якыны - ел әйләнәсендә яшәү өчен. Шул исәптән соңгы елларда коммерциягә нигезләнмәгән бакчачылык ширкәте җирләрендә үз белдекләре белән төзелгән, әмма дача амнистиясе буенча теркәлгән шәхси торак йортлар да бар.
Әгәр бу проектны тормышка ашыру өчен финанс чаралары табылса, участокларны сатып алу федераль закон нигезендә катгый рәвештә башкарылачак. Ул бәйсез эксперт оешмасы тарафыннан билгеләнә торган объектив базар бәясеннән сатып алуны гарантияли. Тәкъдим ителгән бәя белән килешмәгән очракта, милекчеләр судка мөрәҗәгать итәргә һәм өстәмә экспертиза билгеләргә хокуклы.
Очрашуда Архитектура һәм шәһәр төзелеше идарәсе вәкилләре территорияне планлаштыру проектының проектны тормышка ашыру срокларын билгеләмәвен, шулай ук финанслау чыганагын – эшләрне башлау өчен мәҗбүри шартны - билгеләмәвен ассызыклап үттеләр. Әлеге документның төп максаты - иҗтимагый рекреация зонасын беркетү һәм әлеге территориядә теләсә нинди яңа төзелеш урнаштыру мөмкинлеген бетерү.
Район башлыгы, планлаштыру проекты булачак паркның җентекле проектын күздә тотмаганга күрә, микрорайонда яшәүчеләр Универсиада проспекты буенча авышлыкны төзекләндерү буенча үз тәкъдимнәрен белдерә ала, диде.
Фоторепортаж
«Танкодром» микрорайонында яшәүчеләрнең инициативалы төркеме белән очрашу
Шулай ук укыгыз
-
30.04.2025, 15:45 -
30.04.2025, 14:03 -
30.04.2025, 09:14 -
29.04.2025, 17:56
