Казанда яңа юл тамгасы барлыкка киләчәк

Эксперимент буларак аны өч юл чатында төшерәчәкләр

Фото: Денис Гордийко

(Казан шәһәре KZN.RU, 3 нче октябрь). Казанда яңа юл тамгасы барлыкка киләчәк, ул 8.13 «Төп юл юнәлеше» юл билгесен кабатлаячак. Эшләр Вокзал – Путейская, Комсомол – Яруллин, Спартаков – Халев урамнары киселешендә башкарылачак. Бу хакта Россия Эчке эшләр министрлыгының Казан буенча ЮХИДИ бүлегендә хәбәр иттеләр.

«Юл хәрәкәте куркынычсызлыгын тәэмин итү максатыннан, төп юл юнәлешен үзгәртә торган киселешләрдә юл хәрәкәте оешмасының мәгълүматлылыгын арттыру юлы белән, Казанда 8.13 «Төп юл юнәлеше» юл билгесен кабатлаучы эксперименталь юл билгеләрен куллана башладылар», – дип сөйләде Россия Эчке эшләр министрлыгының Казан буенча ЮХИДИ бүлегенең юл күзәтчелеге бүлеге башлыгы вазыйфаларын вакытлыча башкаручы полиция капитаны Илнар Шамилов.

Узган тәүлектә ТР башкаласында 63 юл-транспорт һәлакәте теркәлгән. Нәтиҗәдә, җиде кеше – дүрт шофер, ике пассажир һәм җәяүле – төрле дәрәҗәдәге җәрәхәтләр алган.

Узган ял көннәрендә 392 машина йөртүче һәм 154 җәяүле административ җаваплылыкка тартылган. 83 очракта куркынычсызлык каешларын куллану кагыйдәләре бозылган, 88 очракта машина йөртүчеләр җәяүлеләргә юл бирмәгән, ә балаларны дөрес йөртмәгән өчен өч кешегә штраф салынган. Тагын тугыз автомобиль йөртүче исерек хәлдә руль артына утырган өчен тоткарланган, дип хәбәр иттеләр Россия Эчке эшләр министрлыгының Казан буенча Дәүләт автоинспекциясе пропаганда бүлегендә.

Шулай ук укыгыз

Барлык яңалыклар