БРИКС уеннары алдыннан Казанның сигез спорт объектында ремонт эшләре үткәрелә

Алар арасында Ишкәкле спорт төрләре үзәге, Спортның су төрләре сарае, Теннис академиясе һәм башкалар бар

Фото: Марат Мөгыйнов

Июнь аенда Казанда узачак БРИКС уеннарына шәһәрнең кайбер спорт учреждениеләре: Үзәк стадион, Бокс һәм өстәл теннисы үзәге, Волейбол үзәге, Ишкәкле спорт төрләре үзәге, Спортның су төрләре сарае, Теннис академиясе, «Буревестник» бассейны һәм «Тулпар» спорт комплексы яңартылачак. Аларда ремонт эшләре инде башланды, дип хәбәр итте эшлекле дүшәмбедә социаль өлкә учреждениеләрен карап тоту һәм аларга хезмәт күрсәтү департаменты директоры Илья Коротихин.

Тема буенча материаллар:

Илсур Метшин Казанның Үзәк стадионын реконструкцияләү турында игълан итте

Аның сүзләренә караганда, быел ТР башкаласында берничә халыкара турнир узачак, шул сәбәпле спорт объектларын төзекләндерүгә 5 млрд сумнан артык финанслау бүлеп бирелгән.

«Тарихта тәүге тапкыр үткәрелә торган «Киләчәк уеннары» кысаларында «Хезмәт резервлары» стадионында ремонт эшләре башкарылды, табло, ишекләр, яктырткычлар, сантехника алыштырылды, беренче каттагы коридор идәннәренә резин япма җәелде», – дип уртаклашты Илья Коротихин. Шулай ук ул «Искәндәр» манежында түбәне һәм фасадның декоратив элементларын ремонтлау буенча эшләр башкарылуын да билгеләп үтте.

«Тасма» спорт мәктәбенең җиңел атлетика манежында һәм «Ракета» стадионында программа нигезендә ремонт эшләре дәвам итә. Планда – футбол кыры өслеген алыштыру, йөгерү өчен юллар төзү, инженерлык челтәрләрен һәм түбәне ремонтлау, таблоны алыштыру.

Шулай ук өч универсаль спорт мәйданчыгы төзү каралган, дип өстәде спикер.

Диләрә Гафурова