Казанның Подлужная урамында автоледи 8 яшьлек велосипедчыны бәрдергән

Малай төрле дәрәҗәдәге җәрәхәтләр алган

Фото: Денис Гордийко

(Казан шәһәре KZN.RU, 1 нче сентябрь). Кичә Казанда «Рено» автомобиленең 66 яшьлек йөртүчесе 8 яшьлек малайны бәрдергән.

Казан Дәүләт автоинспекциясе мәгълүматлары буенча, автоледи Подлужная урамы буенча Вишневский урамы ягыннан Толстой урамы юнәлешендә барган. Беренчел мәгълүматлар буенча, Подлужная урамындагы 56 нчы йорт каршында ул РФ Юл хәрәкәте кагыйдәләренең 14.1 пунктын бозган һәм җәяүлегә юл бирмәгән. Малай транспорт чарасы хәрәкәте барышында уңнан сулга көйләнмәгән җәяүлеләр кичүе буенча йөрү өлешен кисеп чыга, шул ук вакытта ашыкмый, ягъни РФ Юл хәрәкәте кагыйдәләренең 24.8 пунктын боза. Юл-транспорт һәлакәтендә бала төрле дәрәҗәдәге җәрәхәтләр ала, медицина ярдәме күрсәтелгәннән соң, аны медицина учреждениесеннән җибәрәләр.

Казанның Дәүләт автоинспекциясендә автомобильчеләргә һәм җәяүлеләргә юл хәрәкәте кагыйдәләрен үтәү кирәклеге турында искә төшерәләр. Узган тәүлектә 520 машина йөртүче һәм 60 җәяүле административ җаваплылыкка тартылган. 95 автомобильче куркынычсызлык каешларын кулланмаган, 48 шофер җәяүлеләргә юл бирмәгән, 12 се балаларны йөртү кагыйдәләрен бозган, ә 10 шофер исерек хәлдә транспорт чарасы белән идарә иткән өчен тоткарланган.

2023 елның 7 аенда Казан юлларында 16 яшькә кадәрге балалар белән 81 юл-транспорт һәлакәте теркәлгән, аларда 87 балигъ булмаган бала төрле дәрәҗәдәге җәрәхәтләр алган.

10 нчы сентябрьгә кадәр шәһәрдә «Игътибар – балалар!» профилактик чарасы уза.

Шулай ук укыгыз

Барлык яңалыклар