Казанның ике мәктәбе территориясендә геройлар Мәгубә Сыртланова һәм Рәфәгат Хәбибуллинга бюстлар урнаштырдылар

Аларны шәһәргә ТР башкаласыннан эшмәкәр Алексей Демидов һәм Краснодар шәһәре вәкилләре Вәлит һәм Юныс Рәхмәтуллиннар бүләк итте.

Фото: Вахитов һәм Идел буе районнары администрациясе

(Казан шәһәре, KZN.RU, 9 нчы декабрь). Бүген Казанда ике гомуми белем бирү мәктәбе территориясендә геройлар Мәгубә Сыртланова һәм Рәфәгат Хәбибуллинга бюстлар урнаштырдылар. Чара Ватан Геройлары көненә багышланды, дип хәбәр итә Казан Башкарма комитетының Мәдәният идарәсе.

Идел буе районының 52 нче гимназиясе ишегалдында Советлар Союзы Герое Мәгубә Гусейн кызы Сыртланованың яңартылган бюстын ачтылар. Аны шәһәргә Казан эшмәкәре Алексей Демидов һәм Краснодардан РФ Кораллы Көчләре хәрби хезмәткәре Юныс Рәхмәтуллин бүләк итте.

Мәгубә Гусейн кызы Сыртланова – өлкән лейтенант, 46 нчы гвардия Таман хатын-кызлар авиация полкы төнге бомбардировщиклар эскадрилья командиры урынбасары. 1942 елның декабреннән ул Бөек Ватан сугышы фронтларында, Төньяк Кавказны саклауда, Таман ярымутравында «Зәңгәр линия» өзелүендә, Новороссийск һәм Севастопольне азат итүдә, Белоруссия, Польша, Көнчыгыш Пруссия территориясендәге сугышларда, Берлинның һөҗүм итү операциясендә катнаша. 782 хәрби очыш ясый.

Авиатөзелеш районындагы 115 нче номерлы мәктәп янында Россия Герое Рәфәгат Мәхмүт улы Хәбибуллинга бюст ачтылар. Аны шулай ук Казан эшмәкәре Алексей Демидов һәм Краснодар эшмәкәре Вәлит Рәхмәтуллин бүләк итте.

Рәфәгат Мәхмүт улы Хәбибуллин – РФ Герое, Россия хәрби очучысы, Һава-космик көчләре армия авиациясенең 55 нче аерым вертолет полкы командиры, полковник. 2016 елның 8 нче июлендә Сириядә Россия Хәрби операциясен үткәрү вакытында һәлак була. 2000 нән артык хәрби очыш башкара.

Бюстларны ачу тантаналарында патриотик оешмаларның җәмәгать эшлеклеләре һәм активистлары, мәктәп укучылары, бюстларны бүләк итүчеләр һәм Татарстан Республикасы һәм Казан җитәкчелеге вәкилләре катнашты.

Шулай ук укыгыз

Барлык яңалыклар