Татарстанга атлантик циклоннар якынлаша – җылы һәм дымлы һава торышы урнашачак

Казанда 16 нчы гыйнварда бераз кар, буран һәм бозлавык көтелә

Фото: Денис Гордийко

(Казан шәһәре KZN.RU, 15 нче гыйнвар). Агымдагы атнада Татарстанда җылы һәм дымлы һава торышы урнашачак. ТР Гидрометүзәгендә моны салкын антициклон урынына көнбатыштан күчеп баручы актив атлантик циклоннар килүе белән аңлаталар. Алар республикага җепшек кар, бураннар һәм көчле җил алып киләчәк.

Әйтик, Казанда 16 нчы гыйнвар төнендә болытлы булачак һәм бераз кар явачак. Шәһәрнең аерым районнарында буран булырга мөмкин. Һава температурасы -12..-14 градус тәшкил итәчәк, юлларда бозлавык барлыкка киләчәк. Көндез һава шартлары сакланачак, әмма термометр баганалары -2..-4 градуска кадәр күтәреләчәк.

Чәршәмбе, 17 нче гыйнварда, республикада кар, җепшек кар, урыны белән көчле буран көтелә. ТРның кайбер районнарында җил секундына 24 метрга кадәр көчәячәк. Төнлә һава температурасы -2..-7 градус тәшкил итәчәк, көнчыгышта – -10 градуска кадәр, ә көндез 0..-5 градуска кадәр җылытачак. Юлларда кар көртләре барлыкка киләчәк.

Пәнҗешәмбе, 18 нче гыйнварда, төнлә бераз кар ява, термометр баганалары аязганда -10..-15 градус кадәр төшәчәк. Көндез явым-төшем ихтималы аз, ә һава температурасы -8..-13 градус тәшкил итәчәк.

ТР Гидрометүзәгенең алдан фаразы буенча 19 нчы һәм 20 нче гыйнварда һава торышы тагын да начарланачак. Кар һәм җепшек кар, буран һәм көчле җил көтелә. Бозлавык булырга мөмкин. Җомга төнендә һава температурасы -12..-17 градус тәшкил итәчәк. 19 нчы гыйнварда көндез һәм 20 нче гыйнварда тәүлек дәвамында -1 дән -6 градуска кадәр салкын фаразлана.

Шулай ук укыгыз

Барлык яңалыклар