Казанның 2 нче Тура урамында транспорт хәрәкәте ай ярымга чикләнәчәк

Сәбәбе – җылылык челтәрләрен төзү

Фото: Марат Мөгыйнов

(Казан шәһәре KZN.RU, 3 нче ноябрь). Иртәгәдән Казанның 2 нче Тура урамында транспорт хәрәкәте чикләнәчәк. Юлның ябылуы декабрьнең икенче яртысына кадәр гамәлдә булачак һәм җылылык челтәрләрендәге эшләр белән бәйле. Шуңа бәйле рәвештә 74 нче автобусның хәрәкәт схемасы вакытлыча үзгәрәчәк.

Хәрәкәтне чикләү ике этапта башкарылачак. Башта 4 нче ноябрьдән Танк боҗрасыннан Төбәкара клиник-диагностика үзәгенә керүгә кадәрге участокта хәрәкәт чикләнәчәк. Төбәкара клиник-диагностика үзәгенә Карбышев урамы ягыннан 2 нче Тура урамы буенча килергә мөмкин булачак. Соңрак 2 нче Тура урамында АЗСтан Төбәкара клиник-диагностика үзәгенә керүгә кадәр хәрәкәт чикләнәчәк, бу хакта өстәмә хәбәр ителәчәк.

Юлның ябылуы сәбәпле, 74 нче номерлы автобусның хәрәкәт схемасы вакытлыча үзгәрәчәк, дип хәбәр иттеләр шәһәрнең Транспорт комитетында. Ул түбәндәге маршрут буенча йөриячәк: Оренбург тракты – Танк урамы – Х.Мәүлетов урамы – Бертуган Касыймовлар урамы – Карбышев урамы – Профессор Камай урамы – Х.Мәүлетов урамы – Җиңү проспекты һәм аннан соң маршрут буенча. Кире юнәлештә: Х.Мәүлетов урамы – Профессор Камай урамы – Карбышев урамы – Бертуган Касыймовлар урамы – Х.Мәүлетов урамы – Танк урамы һәм аннан соң маршрут буенча. Төзелеш эшләре вакытында Төбәкара клиник-диагностика үзәге һәм 18 нче поликлиника пациентларына 74 нче автобуста «Автотранспорт техникумы» тукталышына кадәр барырга киңәш ителә, алар вакытлыча Карбышев урамына күчерелә.

Шулай ук укыгыз

Барлык яңалыклар