Пасхада Казанның барлык гыйбадәтханәләре дә мәхәллә халкы өчен ябык булачак

(Казан шәһәре KZN.RU, 16-нчы апрель). Казанның барлык гыйбадәтханәләре дә Пасхага килүчеләр өчен ябык булачак. Гыйбадәтханәләргә барудан тыелу кирәклеге 14-нче апрельдән алып санитар-эпидемиологик хәл яхшырганчыга кадәр ТР Министрлар Кабинеты карарында язылган.

Казан һәм Татарстан митрополиты Феофан дин тотучыларга «әлеге карарны үтәүләрен» сорап мөрәҗәгать итте. «Без, дин тотучы кешеләр, күңелдәге сыкрау белән булса да, әлеге карарны аңларга һәм акыл белән кабул итәргә тиешбез. Сезгә бу хакта сөйләве җиңел түгел, чөнки Пасха бәйрәме якынлашып килә. Әмма, үлемгә китерә торган коронавирус инфекциясе таралу сәбәпле, тискәре нәтиҗәләр булмасын өчен, без әлеге көннәрдә өйдә булырга һәм Пасха бәйрәме көннәрендә гыйбадәтханәләргә бармаска тиешбез», - дип мөрәҗәгать итте митрополит Феофан Казан епархиясенең руханиларына һәм православие динен тотучыларга. Ул билгеләп үткәнчә, төп гыйбадәт кылулар телевидениедән һәм Интернеттан трансляцияләнәчәк, шул рәвешле һәркем уртак чиркәү гыйбадәтендә катнаша алачак.

Пасха көнендә гыйбадәтханәләргә шәхсән килеп булмаганга, православ казанлылар куличларны, пасха ризыгын, йомыркаларны һәм башка пасха атрибутларын үзләре шәхсән изгеләштерә алалар. Татарстан митрополиясендә моны өй шартларында ничек эшләргә мөмкин булуын аңлаттылар.

Шулай ук республика халкына, санитар-эпидемиологик хәл яхшырганчы, зиратларга барудан тыелырга куштылар: моңа җирләү (күмү) буенча хезмәтләр күрсәтүне рәсмиләштерү һәм күмүдә катнашу очраклары керми. Димәк, әлеге чорда традицион рәвештә зиратларны чистарту өмәләрен соңрак вакытка күчерергә туры киләчәк.

Шулай ук укыгыз

Барлык яңалыклар