2020 елда «Экология» илкүләм проекты кысаларында ТР территориясендә Иделне савыктыруга 6 млрд сум каралган

Казанда чистарту корылмаларын реконструкцияләячәкләр һәм биологик чистарту корылмаларының ләм кырларын рекультивацияләячәкләр.

(Казан шәһәре KZN.RU, 28-нче гыйнвар, Алена Мирошниченко). «Экология» илкүләм проекты кысаларында 2020 елга һәм 2021-2022 елларның планлы чорына Татарстан территориясендә Иделне савыктыруга 6 млрд сум каралган, шул исәптән 5,1 млрд сум – Россия бюджетыннан. Бу хакта бүген ТР Министрлар Кабинетында узган брифингта ТР Экология һәм табигать ресурслары министрының беренче урынбасары - ТР әйләнә-тирә мохитне саклау өлкәсендә баш дәүләт инспекторы Фаяз Шакиров хәбәр итте.

Иделгә агызыла торган пычранган юынты сулар өлешен киметүгә 4,6 млрд сум юнәлдереләчәк. Дәүләт контрактларының гомуми бәясе 1,6 млрд сум булган төзелеш-монтаж эшләре инде 8 объектта бара - Казанда, Тәтештә, Әгерҗе районының Кызыл Бор авылында, Зәйдә, Алексеевск районында, Алабугада, Васильевода һәм Яшел Үзән муниципаль районының Түбән Вязовые авылында. Киләсе елда республиканың биш объектында реконструкция планлаштырылган, моның өчен 884 млн сум каралган, дип хәбәр итте спикер.

«Идел елгасына куркыныч тудыручы тупланган экологик зыян объектларын бетерү» юнәлеше буенча 1,7 млрд сум бүлеп бирелгән, шул исәптән 1,3 млрд сум – РФ бюджетыннан. Татарстан территориясендә тупланган зыянлы ике объектны бетерү каралган: Казан канализациясенең биологик чистарту корылмаларының ләм мәйданчыкларын рекультивацияләү һәм Түбән Кама сусаклагычындагы күл ятмасының эшләми торган торбаүткәргечләрен демонтажлау. Моның өчен 2024 елга кадәр 4,5 млрд сум каралган.

Исегезгә төшерәбез, Казанда Идел буе районы территориясендә Куйбышев сусаклагычына якын урнашкан Отары һәм Иске Победилово бистәләре арасында урнашкан 100 гектардан артык мәйданлы ләм кырларын рекультивацияләү планлаштырыла. Моннан тыш, 2019 елда канализациянең биологик чистарту корылмалары территориясендә барлыкка килә торган ләм утырмасын термомеханик эшкәртү цехы төзелеше башланды. Анда тәүлегенә 340 тонна ләм калдыклары эшкәртәчәкләр, термоутильләштерүдән соң 100 тоннага кадәр бөртекле матдә алыначак

Ф.Шакиров шулай ук «Су төбенә киткән судноларның тискәре йогынтысын киметү», «Уникаль су объектларын саклау» һ.б. юнәлешләр буенча эш алып барылуын әйтте.

Шулай ук укыгыз

Барлык яңалыклар