Нокса Авышлыгында Гаилә елына мурал барлыкка килде

Аны 13 һәм 15 нче йортларда күрергә мөмкин

Казанда Россиядә Гаилә елына багышланган мурал барлыкка килде. Аны Нокса Авышлыгындагы 13 нче һәм 15 нче йортларда күрергә мөмкин, дип хәбәр итә «Гаилә бергә» хәйрия фонды матбугат хезмәте.

Диварларда гаилә тормышының гармониясен һәм шатлыгын гәүдәләндерүче әни, әти һәм бала сурәтләнгән. Фонда космик элементлар күрсәтелгән – алар аша рәссамнар кардәшләрнең һәр кеше өчен үзәк булуын күрсәтергә теләгәннәр.

Идеянең авторлары – абыйлы-энеле Даниил һәм Сергей Сергеевлар. Рәссамнарның эшләре арасында – кан донорларына багышланган мурал, шагыйрь Александр Пушкин сурәте төшерелгән граффити, 18 нче гимназия капкасы янындагы «ТРда цифрлаштыру», 86 нчы мәктәп рекреациясендәге «Счастье в детях» һәм башкалар.

Рәсем «Гаилә бергә» хәйрия фондына ярдәм йөзеннән барлыкка килде, аның ярдәме белән Республика балалар клиник хастаханәсе каршында 11 ел «Йорттан ерак йорт» эшли, анда озак дәваланучы балалары белән ата-аналар бушлай яши ала.

Исегезгә төшерәбез, декабрьдә Казан мэры Илсур Метшинга интерактив карта һәм инде булган яки урнаштырырга планлаштырылган арт-объектлар исемлеге белән мобиль кушымта тәкъдим иттеләр. Проект шәһәрдә яшәүчеләргә һәм туристларга шәһәр сәнгате белән танышырга ярдәм итәчәк, ә рәссамнарга – арт-объектларны урнаштыру өчен локацияләр сайлауны гадиләштерәчәк.

Шулай ук укыгыз

Барлык яңалыклар