Казанның муниципаль пляжларында су коену сезоны башланганнан бирле 14 кешене коткарганнар

Көн саен шәһәр халкының су янында ялын Суларда коткару җәмгыятенең 70 хезмәткәре күзәтә

Көн саен биш муниципаль пляжда һәм өч оештырылган ял итү урынында Казанның Суларда коткару җәмгыятенең (ОСВОД) якынча 70 хезмәткәре кизү тора. Су коену сезоны башыннан алар 14 кешене коткара алган, тагын 100 дән артык шәһәр кешесенә беренче ярдәм күрсәтелгән. Бу хакта KZN.RU порталы корреспондентына Казанның ОСВОД советы рәисе Никита Коробицын сөйләде.

Коткаручылар постлары су янында ял итүнең барлык оештырылган урыннарында урнаштырылган. Шәһәр халкы арасында Зур Аккош күле һәм Комсомол күлләре янындагы пляжларның популярлыгы сәбәпле постлар саны ике тапкырга арткан. Һәр урында өчәр коткаручы кизү тора: өлкән коткаручы һәм ике кече хезмәткәр. Су коену сезоны башланыр алдыннан алар махсус программа буенча белем алганнар.

ОСВОД хезмәткәрләре эшләрендә коткару көймәләрен, калкавычлы бау, коткару түгәрәкләре һәм жилетлары, мегафоннар кулланалар. Ял итү урыннарында сары яки кара флаг эленгән флагшток бар (су коенырга рөхсәт ителә һәм тыела).

Пляжларда һәм су янында ял итү урыннарында су йөзәргә рөхсәтле зоналарны билгеләгән махсус тамгалар, балалар өчен коену зоналары, зыян күрүчеләргә беренче ярдәм күрсәтү өчен аптечкалы медицина постлары бар.

«Коткаручыларның бурычы — бәхетсезлек очраклары куркынычын киметү һәм һәлакәтләргә юл куймау», – дип ачыклык кертте спикер. Кирәк булганда алар беренче ярдәмне күрсәтәләр, ял итүчеләрнең сорауларына җавап бирәләр, ял итү урыннарын тикшерәләр яки мегафон аша гражданнарга мөрәҗәгать итәләр.

«Тәҗрибә барысын да хәл итә, оста коткаручылар пляж күренешен башкача аңлый. Әгәр алар уңайсыз вәзгыятьне һәм куркынычларны күзәтсәләр, шунда ук профилактик эш алып баралар һәм ял итүчеләрне кисәтәләр», – дип уртаклашты Никита Коробицын.

Бәхетсезлек очракларының төп сәбәпләре булып җиһазландырылмаган урыннарда һәм исерек хәлдә коену кала. Мондый хәлләрне булдырмау өчен коткаручылар көн саен оешкан һәм оештырылмаган ял итү урыннарын тикшерәләр. Хокук бозуларны ачыклаганда алар гражданнар белән әңгәмә кора, ә алар кисәтүләрне игътибарсыз калдырса, полиция хезмәткәрләрен чакырта.

Су коену сезоны башланганнан бирле Казанның ОСВОД хезмәткәрләре биш мәктәптә 1,5 меңнән артык хәтерләтү басмасы өләштеләр һәм профилактик әңгәмәләр үткәрделәр. «Акцияләр даими үткәрелә. Системалы эш алып бару мөһим, шулай итеп без суда үз-үзеңне куркынычсыз тоту тәртибе дәрәҗәсен күтәрәбез. Кешеләрнең үз-үзләрен тоту культурасы шулай ук пляжларны төзекләндерүгә бәйле дип уйлыйм», - дип саный Никита Коробицын.

Коткаручылар кешеләрнең судагы куркынычсызлыгы өчен 10 елдан артык җаваплы, дип өстәде ул. Бу вакыт эчендә оешмада күпьеллык тәҗрибәле хезмәткәрләр төркеме оешкан, әмма постларда шулай ук яшь белгечләр кизү тора.

Исегезгә төшерәбез, Быел Казанда биш пляжда (Локомотив, Түбән Елга аръягы, Тирән, Комсомол, Зур Аккош күлләрендә) һәм өч оештырылган ял итү урынында (Аккош күле, Изумрудное күлләрендә, Җиңү паркында) 10 коткару посты ачылды. Коткаручылар гадәттә 9:00 дан 20:00 сәгатькә кадәр эшли, әмма Комсомол күлендә (8:00 дән 20:00 сәгатькә кадәр) һәм Түбән Елга аръягы күлендә (9:00 дан 21:00 сәгатькә кадәр) кизү тору вакыты үзгәртелгән.

Шулай ук укыгыз

Барлык яңалыклар