«Миллениум» күпереннән Кремль дамбасына кадәр Казансу елгасында кече суднолар куллануны вакытлыча тыячаклар

Тиешле карар Татарстан Республикасы Министрлар кабинетында имзаланды.

(Казан шәһәре KZN.RU, 5-нче июнь). Казансу участогында «Миллениум» күпереннән Кремль дамбасына кадәр Red Bull Air Race авиаузышлары буенча дөнья чемпионаты һәм триатлон буенча Европа чемпионаты этабы вакытында кече, җилкәнле, ял өчен эшләнгән, спорт судноларын, шул исәптән гидроциклларны, байдарка, ишкәк ишү көймәләрен куллануны тыялар. Тиешле карар Татарстан Республикасы Министрлар кабинетында имзаланды.

Red Bull Air Race авиаузышлары буенча дөнья чемпионаты этабын уздыру вакытында тыю 12-нче июньнең 7.30 сәгатеннән 19.00 сәгатенә кадәр, 13-нче һәм 14-нче июньнәрнең 8.30 сәгатеннән 18.00 сәгатенә кадәр, 15 июньнең 9.30 сәгатеннән 17.30 сәгатенә кадәр, 16 июньнең 11.00 сәгатеннән 17.30 сәгатенә кадәр гамәлдә булачак.

Исегезгә төшерәбез, ярышлар үткәрү белән бәйле рәвештә 14-еннән 16-нчы июньгә кадәр Казанда Сибгат Хәким һәм Бондаренко урамнарында транспорт хәрәкәте чикләнәчәк, ә 15-нче һәм 16-нчы июньдә Декабристлар урамы һәм Әмирхан проспекты участокларында җәяүлеләр өчен хәрәкәт чикләнәчәк.

Триатлон буенча Европа чемпионаты вакытында 27-нче һәм 28-нче июльдә 8.00 сәгатьтән 18.00 сәгатькә кадәр кече суднолар кулланырга ярамый.

Шулай ук тыюлар Зөя һәм Иделдә Зөя утрау-шәһәрчеге чикләрендә ярдан 600 метр ераклыкта Sviyaga Swim-2019 триатлон буенча ярышлар уздыру вакытында 6-нчы июльдә һәм Timerman Full-2019 чаралары вакытында 31-нче августта гамәлдә булачак.

Тыюлар триатлон буенча ярышларны һәм 2019 елгы Red Bull Air Race авиаузышлары буенча дөнья чемпионаты этабы ярышларын әзерләү һәм үткәрү өчен җәлеп ителгән судноларга кагылмый, дип хәбәр ителә Россия гадәттән тыш хәлләр министрлыгының ТР буенча Баш идарәсе сайтында.

Шулай ук укыгыз

Барлык яңалыклар