Сәид-Галиев исемендәге мәдәният йортында уза торган фотокүргәзмәдә гаиләле булырга хыялланучы балалар турында сөйләячәкләр

Проект ярдәмендә 30 дан артык баланы тәрбиягә алганнар.

Фото: Денис Гордийко

(Казан шәһәре KZN.RU, 31 нче май). 1 нче июнь көнне Казан шәһәренең Сәид-Галиев исемендәге мәдәният йортында күчмә социаль фотокүргәзмә ачыла. «ПАПАМАМАЕСТЬ» проекты ятим, ата-ана каравыннан мәхрүм калган һәм Татарстан балалар йортларында яшәүче балаларны гаиләләргә урнаштыруга ярдәм итүгә юнәлдерелгән.

Күргәзмә экспозициясендә ятим балалар төшерелгән 40 ка якын фотосурәт тәкъдим ителәчәк, шулай ук бала турында кыскача мәгълүмат күрсәтеләчәк. «Мы вместе!» Татарстан Республикасы тәрбиягә бала алган гаиләләрнең региональ иҗтимагый оешмасыннан фотографлар-волонтерлар сурәтләрдә кабатланмас шәхесне ачу, бу балаларның күзләрендә ата-аналар кайгыртуы турындагы хыялны чагылдыру өчен барлык осталыкларын кулланган.

Фотокүргәзмәне ачу тантанасында «Поверь в себя» коммерцияле булмаган автоном оешмасы һәм Сәид-Галиев исемендәге мәдәният йорты иҗат коллективлары тарафыннан әзерләнгән концерт булачак. Кунаклар алдында Казан һәм ТР районнарыннан килгән яшь артистлар чыгыш ясаячак.

Фотокүргәзмәне ачу 11:00 сәгатьтә планлаштырылган, дип хәбәр итә «Игелекле Казан» коммерцияле булмаган автоном оешмасы матбугат хезмәте.

Проект «Мы вместе!» республика иҗтимагый оешмасы тарафыннан, ТР Мәгариф һәм фән министрлыгы, Республика уллыкка алу, опека һәм попечительлек үзәге, ата-ана каравыннан мәхрүм калган балаларны гаиләләргә урнаштыру буенча Казан үзәге ярдәме белән гамәлгә ашырыла. 2017 елда үткәрелгән беренче күчмә фотокүргәзмә ярдәмендә 30 дан артык бала гаиләле булган.

Шулай ук укыгыз

Барлык яңалыклар