Made in Kazan форумында яңа шартларда бизнес үсеше турында фикер алышачаклар

Чарада катнашу өчен 300 дән артык гариза килгән инде.

Фото: Марат Мөгыйнов

(Казан шәһәре KZN.RU, 22 нче апрель). 25 нче апрельдә Казанда Made in Kazan форумы узачак, анда яңа икътисадый шартларда бизнес үсеше турында фикер алышачаклар. Чара эшкуарларны, компанияләрнең топ-менеджерларын, хакимият вәкилләрен җыячак. Форум барлыгы 100 катнашучыны, шул исәптән икътисадның 11 тармагы буенча экспертларны берләштерәчәк. Шул ук вакытта чарада катнашуга инде 300 гә якын гариза бирелгән.

Быел форум Global Mind – күмәк фикер алышу форматында узачак. Катнашучылар экспертлар белән бергә икътисад үсешенең мөмкин булган перспективаларын билгеләячәк һәм тактик гамәлләр эшләячәк, шул исәптән яңа партнерлар булдыру юнәлеше каралачак. Очрашу ышаныч икътисадын формалаштыру принципларына багышлана.

Чарада Казан Мэры Илсур Метшин, «МДМ-Банк» директорлар советы рәисе, Мәскәү биржасының бәйсез директоры Олег Вьюгин, «Татнефть» ГАҖ генераль директоры һәм директорлар советы әгъзасы Наил Маганов, бизнес-партнерлар буенча эксперт, бәйсез хокук киңәшчесе, executive&team коуч, системалы бизнес-консультант Наталья Бельзер чыгыш ясаячак.

Тармак өстәлләренең модераторлары Uremont халыкара онлайн-сервисына нигез салучы, Мәскәүдә эшмәкәрләрнең хокукларын яклау буенча вәкаләтле вәкилнең Көньяк-Көнчыгыш административ округында җәмәгать кабул итү бүлмәсе җитәкчесе Артур Терисаян, Kazan Express маркетплейсына нигез салучы һәм генераль директоры Линар Хөснуллин, «Алабуга» аерым икътисадый зонасы генераль директоры, ТР Дәүләт Советы депутаты Тимур Шаһивәлиев һәм башка эре предприятиеләрнең җитәкчеләре һәм бизнес вәкилләре булачак.

Форумны уздыру урыны – Kazan Palace by Tasigo отеле. Онлайн-трансляциягә барлык теләүчеләр дә кушыла алачак.

Проект Казан Мэриясе белән берлектә оештырыла. Форум 2010 елдан бирле уздырыла һәм шәһәрнең әһәмиятле вакыйгасы булып тора. Чараларда танылган спикерлар белән бергә актуаль темалар буенча фикер алышалар. Made in Kazan уздыруны яңарту карары Казан Мэры Илсур Метшинның шәһәрдә март уртасында төзелгән кризиска каршы штаб эше кысаларында даими уздырыла торган бизнес вәкилләре белән очрашулары нәтиҗәләре буенча кабул ителде.

Шулай ук укыгыз

Барлык яңалыклар