Киләсе елга «Сосновая роща» паркында этләр йөртү мәйданчыгы, ә Мир урамындагы паркта скейт-мәйданчык булдырылачак

Ел башыннан «Халык контроле» системасы аша Парклар һәм скверлар дирекциясенә 461 гариза килгән, шуларның 335-е хәл ителгән.

Фото: Денис Гордийко

(Казан шәһәре KZN.RU, 19-нчы октябрь, Алена Мирошниченко). Язгы-җәйге сезон дәвамында Казанның иҗтимагый киңлекләрендә ашыгыч һәм вак ремонт эшләре алып барылды. Ел башыннан «Халык контроле» системасы аша Парклар һәм скверлар дирекциясенә 461 гариза килде, шуларның 335-е хәл ителде, 63-е эшләнә, дип хәбәр итте бүген эшлекле дүшәмбедә дирекция җитәкчесе Марат Закиров.

Быел «Континент» паркында скейт-мәйданчык өслеген тулысынча алыштырдылар, Мир урамындагы паркта архитектура формалары реставрацияләнде, барлык агач юллар төзекләндерелде, Горки-Әмәт урманындагы барлык эскәмияләр буялды, «Крылья Советов» паркында сөйләм хәбәр итү системасы ремонтланды, биш паркта балалар өчен уен элементлары яңартылды һәм асфальт-бетон өслек ремонтланды.

«Кызганычка каршы, вандализм белән дә очрашырга туры килә. Җиңү паркында, «Ак чәчәкләр» һәм «Фестиваль» бульварларында, «Крылья Советов» паркындагы очраклар шаккаткыч булды. Халыктан парк милкенә сак карауларын сорыйбыз», - дип ассызыклады М.Закиров.

Эре проектларны да билгеләп үтәргә кирәк. Агымдагы елның августында реконструкциядән соң Сәет-Галиев исемендәге мәдәният йорты янындагы парк һәм Кабан күле яр буе ачылды (эшләрнең икенче чираты тәмамланды). «Черек күл» паркын реконструкцияләүнең өченче чираты кысаларында эшләр дәвам итә. Бүгенге көндә паркта юлларның өслеге алыштырылган, йөгерү юлларын салу, яшелләндерү һәм «Гашыйклар аркасын» ремонтлау эшләре алып барыла.

Спикер сүзләренчә, фаразланган бюджет финанславын саклап калганда Парклар һәм скверлар дирекциясе 2021 елга җәмәгать урыннарын ремонтлау гына түгел, яхшырту бурычын да куя. Мәсәлән, «Сосновая роща» паркында Ибраһимов проспекты ягыннан халыкның аз мобильле төркемнәре өчен пандус оештыру, этләр йөртү өчен мәйданчык булдыру, Мир урамындагы паркта скейт-мәйданчык булдыру, башка проектларны яхшырту планлаштырыла, дип планнары белән уртаклашты Парклар һәм скверлар дирекциясе җитәкчесе.

Казан Мэры Илсур Метшин билгеләп үткәнчә, парклар һәм скверларны төзекләндерү уңайлы мохит булдыру буенча милли проектны гамәлгә ашыруның мөһим өлешенә әйләнде. Шул ук вакытта шәһәр башлыгы ассызыклаганча, Парклар һәм скверлар дирекциясе төзелү чорында мөстәкыйль структура буларак проектларны финанслау мәсьәләсе кискен торган. «Бу акчаларны табу бер эш, ә икенчесе - дефицитлы бюджетта аларны алдан күрү. Республика җитәкчелегенә, шәхсән Президент Рөстәм Миңнехановка рәхмәт, ул әлеге территорияләр үсешенең зур социаль потенциалын күрде», - дип сөйләде И.Метшин.