Казанның Мәскәү районында яшьләр үзәге 70% ка әзер

Ай саен учреждениегә 1500 бала йөри алачак

Фото: Киров һәм Мәскәү районнары администрациясе матбугат хезмәте

(Казан шәһәре KZN.RU, 16 нчы август). Казанның Мәскәү районында яшьләр үзәген төзү эшләре 70% ка диярлек үтәлгән. Ел ахырына кадәр учреждениене ачарга планлаштыралар, аңа ай саен 1500 бала йөри алачак.

Черноморск урамындагы бинада туристлык-туган якны өйрәнү үзәге, күп функцияле киңлекләр һәм спорт клубы барлыкка киләчәк. Мәсәлән, беренче катта зал һәм душ бүлмәләре булган киенү бүлмәләре, ә икенче катта драма түгәрәге һәм хор өчен мәйданчык, грим бүлмәсе һәм теоретик дәресләр өчен бүлмәләр урнаштырылачак. Өченче катта укытучылар өчен методик кабинет, терраса һәм 48 урынга исәпләнгән күп функцияле зал барлыкка киләчәк. Үзәктә форумнар һәм экспертлар белән очрашулар үткәрергә планлаштыралар, дип хәбәр итте үзенең Telegram-каналында Казанның Киров һәм Мәскәү районнары администрациясе башлыгы Сергей Миронов.

Исегезгә төшерәбез, республика акчалары исәбенә ТР башкаласы өчен өч яшьләр (яшүсмерләр) клубы проектлана. Аларны Академик Арбузов, Солидарность һәм Ютазы урамнарында элек файдаланылмый торган биналарда ачарга планлаштыралар.

Шулай ук шәһәрдә Кече Мәскәү урамында урнашкан «Вертолет» яшьләр үзәгендә капиталь ремонт дәвам итә. Эшләр тәмамланганнан соң учреждениегә аена 2 меңнән артык яшүсмер, ә секцияләргә даими нигездә аена бер меңгә якын бала йөри алачак. Май аенда ремонт эшләренең барышын Казан Мэры Илсур Метшин тикшерде.

Шулай ук укыгыз

Барлык яңалыклар