Казанның 130 диджитал-экранында Покрас Лампасның эшен күрсәтәчәкләр

Проект таң һәм шәфәкънең цикллы алмашынуларыннан, цифрлы каллиграфик скульптуралардан торган портал тәкъдим итә

Фото: «НУР» халыкара медиа сәнгать фестиваленең матбугат хезмәте

(Казан шәһәре KZN.RU, 7 нче сентябрь). Рәссам Покрас Лампас Казан тамашачылары өчен «Таң – Шәфәкъ – Таң: Мәдәният/Табигать» эшен иҗат итә. Проектны шәһәрнең 130 диджитал-экранында күрергә мөмкин булачак.

Проект таң һәм шәфәкъ алмашынуларыннан, цифрлы каллиграфик скульптуралардан торган порталдан гыйбарәт. Өч көн дәвамында ул Казан юллары буенча ачылачак, мәдәни һәм табигый цикллар аша алга баруны символлаштырачак.

Цифрлы күргәзмәне 8 нче сентябрьдән 10 нчы сентябрьгә кадәр 22:00 сәгатьтән 22:02 сәгатькә кадәр «НУР» халыкара медиа сәнгать фестивале уздырылган көннәрдә күрергә мөмкин булачак.

Исегезгә төшерәбез, вакыйга бөтен Казан буенча 10 нан артык локацияне үз эченә алачак: шәһәр халкы һәм кунаклары рәссамнарның күргәзмәләрен һәм инсталляцияләрен күрә, лекцияләргә йөри, Кремльнең Спас манарасында маппинг-шоу күрә алачак, шулай ук «Ак Барс Арена» стадионында NUR NIGHT кичәсенә эләгәчәк. Тулы программаны сылтама буенча күрергә мөмкин.

Покрас Лампас – хәзерге каллиграфиянең иң якты вәкилләренең берсе һәм сәнгатьтә каллиграфутуризм дип аталган яңа юнәлешкә нигез салучы. Автор арт-проектлар өстендә эшне бөтен дөнья буенча күргәзмәләр, перформанслар һәм стрит-арт фестивальләр белән берләштерә, шәһәр мохитендә һәм интерьерда масштаблы каллиграфик композицияләр ясый.

Шулай ук укыгыз

Барлык яңалыклар