РФ юстиция министры: «Закон ягыннан күпме гуманлы булма, әгәр СИЗО ХІХ гасыр бинасында урнашкан икән, анда нормаль шартларны тәэмин итү мөмкин түгел»

Россиядә судьялар, тикшерүчеләр, адвокатлар, прокурорлар һәм җәмәгать вәкилләре өчен шартлар белән берләштерелгән типтагы учреждениеләр төзелә башлаячак

Фото: Дмитрий Андреев / Росконгресс фонды

(Казан шәһәре KZN.RU, 28 нче сентябрь, Зилә Гайфи). Россиядә тикшерү изоляторларын масштаблы үзгәртеп кору көтелә. Аларга алмашка судьялар, тикшерүчеләр, адвокатлар, прокурорлар һәм иҗтимагый оешма вәкилләре өчен заманча шартлар булган берләштерелгән типтагы учреждениеләр (СИЗО һәм төзәтү учреждениеләре) киләчәк. Быел сынау проекты Калуга өлкәсендә гамәлгә ашырыла, дип хәбәр итте бүген II Казан халыкара юридик форумында РФ юстиция министры Константин Чуйченко.

Министр фикеренчә, җинаять-җәза системасының өлкәсе сыйфатлы үзгәрешләргә мохтаҗ – аны гуманизацияләү һәм инфраструктура үсеше кирәк

«Закон ягыннан күпме гуманлы булма, әгәр СИЗО ХІХ гасыр бинасында урнашкан икән, анда нормаль шартларны тәэмин итү мөмкин түгел. Судлар, тикшерүчеләр, адвокатлар, прокурорлар һәм иҗтимагый оешмалар өчен заманча шартлар белән берләштерелгән типтагы учреждениеләр төзү бурычы тора. Быел пилот проекты Калуга өлкәсендә гамәлгә ашырыла», - дип сөйләде ул.

Шулай ук төзәтү үзәкләре челтәрен киңәйтү дә планлаштырыла. 2022 елда илдә мәҗбүри эшләр рәвешендә җәзаны үтәү өчен 40 меңнән артык урын булдырылган. Август аена 380 учреждениедә 43 мең урын бар, шуларның яртысыннан артыгы шәхси предприятиеләрдә. 2024 елга урыннарны 80 меңгә кадәр арттыру планлаштырыла, дип хәбәр итте Константин Чуйченко.

Моннан тыш, Административ хокук бозулар турында РФ кодексына үзгәрешләр әзерләнә.

II Казан халыкара юридик форумы 28-29 нчы сентябрьдә уза, анда 600 дән артык кеше җыелачак. Алар арасында хакимият органнары, юридик, педагогик һәм бизнес-җәмәгатьчелек вәкилләре, 10 илдән һәм 30 дан артык шәһәрдән (Россия, Һиндстан, Кытай, Бразилия, Белоруссия, Казахстан, Үзбәкстан һ.б.) галимнәр бар.

Быел форум илебездә мөһим вакыйгалар фонында уздырыла. Алар арасында – Россия империясенең беренче юстиция министры Гавриил Державинның 280 еллык юбилее, РФ Хөкүмәте каршындагы Закон чыгару һәм чагыштырма хокук белеме институтының 100 еллыгы, РФ Конституциясенең 30 еллыгы.