Казанның «Яратылыш» фондының кыска метражлы фильмнары Бөтенроссия фестивалендә өч тапкыр лауреат исеменә лаек булды

Алар арасында начар ишетүче балалар катнашында төшерелгән «Закрыть неприятность» фильмы да бар.

(Казан шәһәре KZN.RU, 11-нче март). Казанның «Яратылыш» балалар киносын үстерү фондының кыска метражлы фильмнары өч тапкыр Владивостоктагы «Веселая ларга» X Бөтенроссия балалар киносы һәм телевидениесе фестиваленең лауреатлары булдылар.

Фестиваль лауреатлары арасында – Андрей Буторин сценарие буенча төшерелгән «Закрыть неприятность» фильмы, анда начар ишетүче балалар катнашты. Шулай ук дипломнар белән «Әниләр көне» һәм «Аерылышу» дип аталган кыска метражлы фильмнар да билгеләп үтелде. Барлык өч картина да Казанда төшерелгән «Чынлап та, шаярып та» («И в шутку, и всерьез») киноальманахына керә.

2019-2020 елларда әлеге киноальманахның кыска метражлы балалар фильмнары дәрәҗәле балалар кинофестивальләрендә 18 бүләк алды. «Яратылыш» балалар киносын үстерү фонды проектының уникальлеге шунда ки, фильмнарга сценарийлар актерлар өчен махсус языла, чөнки балалар – профессиональ артистлар түгел.

Хәзерге вакытта Казанда киноальманахның яңа сезонын төшерәләр, ул 10 кыска метражлы фильмнан торачак. Аларның берсенә сәламәтлек мөмкинлекләре чикләнгән балалар җәлеп ителәчәк – төшерүдә Ласточкина исемендәге мәктәп-интернатта тәрбияләнүчеләр катнашачак. Фильмнар Вахитов районының 27-нче номерлы гимназиясендә, шулай ук шәһәрнең башка локацияләрендә узачак, дип хәбәр итә ТР Мәдәният министрлыгының матбугат хезмәте.

Проект «Яратылыш» фонды тарафыннан Президент грантлары фонды һәм ТР Мәдәният министрлыгы ярдәме белән тормышка ашырыла.

Шулай ук укыгыз

Барлык яңалыклар