Казанның «Манзара» паркы концепциясен яңадан караячаклар

Бу җәмәгать киңлегенең Җәмигъ мәчете белән янәшә булуы белән бәйле.

Фото: Денис Гордийко

(Казан шәһәре KZN.RU, 5 нче апрель, Алинә Бережная). Казанда Кремль һәм Киров дамбасы арасында урнашкан «Манзара» паркының концепциясе яңадан каралачак. Бу «Кырлай» аттракционнар паркы урынында Җәмигъ мәчетен төзү карары белән бәйле.

«Мондый күршелекнең безгә аерым бурычлар йөкләвен аңлыйбыз, – дип билгеләп үтте бүген ТР Министрлар Кабинетында узган брифингта «ТР шәһәрләре үсеше институты» фондының архитектура проектлары департаменты җитәкчесе Наилә Зиннәтуллина. – Паркның концепциясе мәчет урнашкан урын белән җәяүлеләр агымын бәйләү өчен яңадан каралачак».

Проект буенча «Манзара» паркында коену урыннары каралган иде. «Безнең бурыч – мәчет белән күршелек уңайлы булсын, иҗтимагый конфликтлар тумаслык итеп концепция проектын үзгәртү», – дип ассызыклады Наилә Зиннәтуллина. Ул паркның яңа концепциясе халык белән фикер алышуга куелачагын да өстәде.

Исегезгә төшерәбез, Җәмигъ мәчетенең эскиз проектын эшләүгә халыкара конкурс башланды. Ул Казансуның уң ярында, «Кырлай» аттракционнары паркы урынында урнашачак. Мәчет кимендә 10 мең кешене сыйдыра алачак. Нигезгә беренче ташны 20 нче майда салу планлаштырыла, ә көзен – төзелеш эшләренә керешү.

Шулай ук укыгыз

Барлык яңалыклар