Казанда коррупциягә каршы тематикага иҗади эшләр конкурслары башланды

Катнашучылар биш минутлык видеоролик, кыска видео төшерә яки анимация булдыра ала.

Фото: Денис Гордийко

(Казан шәһәре KZN.RU, 19-нчы октябрь). Казанда коррупциягә каршы тематикага иҗат эшләре конкурслары башланды: «Коррупциягә каршы юнәлештәге иң яхшы видеоролик», «Коррупциягә каршы юнәлештәге иң яхшы кыска видео», «Коррупциягә каршы юнәлештәге иң яхшы анимация». Анда мәктәп укучылары, югары уку йортлары һәм һөнәри белем бирү йортлары студентлары, шулай ук 35 яшькә кадәрге казанлылар катнаша ала.

«Коррупциягә каршы юнәлештәге иң яхшы видеоролик» конкурсына 3-5 минутлык, «Коррупциягә каршы юнәлештәге иң яхшы кыска видео» конкурсына 20 секундлык роликлар кабул ителә. «Коррупциягә каршы юнәлештәге иң яхшы анимация» конкурсында 5 секундлык анимацион роликлар каралачак.

Җиңүчеләр өчен призлар каралган: иң яхшы видеоролик конкурсында җиңүче 30 мең сум алачак, икенче урын өчен – 20 мең сум, өченче урын өчен – 10 мең сум биреләчәк. Иң яхшы кыска видео конкурсында беренче урын өчен 20 мең сум, икенче урын өчен – 15 мең сум, өченче урын өчен – 10 мең сум күләмендә акчалата бүләк каралган. Иң яхшы анимация конкурсында беренче урын өчен 10 мең сум каралган, икенче урын өчен – 8 мең сум, өченче урын өчен – 7 мең сум, дип хәбәр итәләр Казан Башкарма комитетының Контроль һәм коррупциягә каршы эш идарәсендә.

Катнашу өчен гаризалар һәм конкурс материаллары 8-нче ноябрьгә кадәр тапшырыла. Аларны kzn-konkurs@yandex.ru электрон почтасына җибәрергә мөмкин, почта адресы: Татарстан Республикасы, Казан шәһәре, Кремль урамы, 1, 622-нче кабинет, шулай ук күрсәтелгән адрес буенча шәхсән китерергә дә мөмкин.

Конкурсның икенче этабына кертелгән барлык эшләр дә Казан җирле үзидарә органнарының рәсми порталының «Коррупциягә каршы тору» дигән өстәмә битендә урнаштырылачак . Икенче этап 12-нче ноябрьдән 29-нчы ноябрьгә кадәр ачык онлайн-тавыш бирү, ә нәтиҗәләр ясау 30-нчы ноябрьгә планлаштырылган. Өченче этапка һәр конкурс буенча иң күп тавыш җыйган 10 катнашучы кертелә.

Конкурсларда катнашу шартлары һәм эшләргә карата таләпләр белән тулырак нигезләмәләрдә танышырга мөмкин :«Коррупциягә каршы юнәлештәге иң яхшы видеоролик», «Коррупциягә каршы юнәлештәге иң яхшы кыска видео» һәм» коррупциягә каршы юнәлештәге иң яхшы анимация»).Тулырак мәгълүматны шулай ук телефон аша да ачыкларга була: +7(843)299-17-09, +7(843)299-17-08.