Казанда татар телен өйрәнү буенча иң яхшы проектка конкурс башланды

Быел приз фонды 2 млн сум тәшкил итә.

Фото: тел культурасы өлкәсендә милли сәясәтне гамәлгә ашыру бүлеге

(Казан шәһәре KZN.RU, 3 нче апрель). Татарстан башкаласында «Үз телем» дигән татар телен өйрәнү буенча иң яхшы проектка икенче конкурс старт алды. Үз идеяләрен 35 яшькә кадәрге казанлылар тәкъдим итә ала. Приз фонды 2 млн сум тәшкил итә, дип хәбәр итә Казан Башкарма комитетының тел культурасы өлкәсендә милли сәясәтне гамәлгә ашыру бүлеге.

Катнашу өчен гаризалар 9 нчы июльгә кадәр кабул ителә, аларны сылтама буенча тутырырга мөмкин. Проект татар телен өйрәнүнең стандарт булмаган, нәтиҗәле һәм яшьләр мөмкинлекләрен чагылдырырга тиеш. «Медиапроект», «Digital-проект», «Мәгариф проекты», «Күңел ачу проекты», «Мәдәният һәм иҗат өлкәсендәге проект» һәм «Вакыйгалар проекты» номинацияләре каралган.

Читтән торып сайлап алудан соң жюри финалистларны билгеләячәк, алар проектны офлайн форматта тәкъдим итәчәк. Тулырак мәгълүматны конкурс сайтында табып була.

«Үз телем» конкурсы беренче тапкыр 2021 елда балалар һәм яшьләр арасында татар телен өйрәнү һәм татар милли мәдәниятен үстерү буенча актуаль проектларны булдыру һәм алга җибәрү максатыннан үткәрелде.

Узган ел 5 проект авторы грантлар алды, алар арасында сүзләрне тәрҗемә итү буенча IT-сервис, «Яшел китап» дип аталган яшь натуралистның өстәл китабы, «Бөҗәкләр алдаша беләме?» балалар өчен энциклопедиясе, SkyTat татар телендә комикслар һәм татар теленең онлайн-клубы. Барлык проектлар да уңышлы тормышка ашырылган.

Шулай ук укыгыз

Барлык яңалыклар