Казаннан Калининградка авиарейслар саны ике тапкырга арткан

15 гыйнвардан башлап әлеге маршрут буенча яңа очыш программасы – Түбән Новгород аша эшли башлый.

(Казан шәһәре KZN.RU, 15-нче гыйнвар). 15 гыйнвардан Казаннан Калининградка ике яңа рейс ачылды, самолетлар Түбән Новгород аша хәрәкәт итәчәк.

Очышлар сишәмбе һәм пәнҗешәмбе көннәрендә башкарылачак. Мәсәлән, очкыч Казаннан сишәмбе көннәрендә 7.30 сәгатьтә кузгала, Түбән Новгородка 8.20 сәгатьтә килә һәм аннан Калининградта 10.30 сәгатьтә утыра. Пәнҗешәмбе көнне самолет Казаннан 12.10 сәгатьтә шулай ук Түбән Новгород аша (13.00) оча, Калининград аэропортына 15.15 сәгатьтә килеп җитә.

Маршрут буенча кире очышлар шулай ук сишәмбе һәм пәнҗешәмбе көннәрендә башкарылачак. Сишәмбе көнне самолет 11.30 сәгатьтә Калинингардтан китә, Түбән Новгородка 14.45 сәгатьтә җитә һәм Казанда 16.25 сәгатьтә утыра. Пәнҗешәмбе көнне - 16.05 сәгатьтә кузгала, Түбән Новгородта 19.25 булачак, 21.00 сәгатьтә Казанга килә. Һәрбер аэропорт өчен җирле вакыт күрсәтелгән. Җәдвәлгә үзгәрешләр кертелергә мөмкин.

Исегезгә төшерәбез, "ЮВТ АЭРО" авиакомпаниясе шулай ук Казаннан Калининградка – чәршәмбе һәм шимбә көннәрендә ике туры рейс башкара. Шулай итеп, ике яңа рейс барлыкка килү белән, татарстанлылар Казаннан атнага 4 тапкыр Россиянең көнбатыш регионына китә ала, дип хәбәр ителә Казан аэропорты сайтында.

Шулай ук укыгыз

Барлык яңалыклар