Казанлылар игелекле эшләр марафонында катнаша

Дүшәмбе көннәрендә бер атна эчендә эшләргә кирәк булган игелекле эшләр исемлеге игълан ителә.

(Казан шәһәре KZN.RU, 10-нчы февраль). Казанлылар «Игелекле Казан» проекты кысаларында оештырылган «Игелекле февраль» марафонында катнаша.

Марафонда катнашу өчен, Instagram социаль челтәрендә «Игелекле Казан» проекты сәхифәсенә язылырга кирәк. Дүшәмбе көннәрендә сәхифәдә бер атна эчендә эшләргә кирәк булган игелекле эшләр исемлеге эленә. Марафонда катнашучылар социаль челтәрдәге үз сәхифәләрендә башкарылган эшләр турында фото яки видео хисап чыгарырга тиеш.

Әйтик, 1-нче февральдә башланган акциянең беренче атнасы экологиягә багышланган иде. Катнашучыларга бер көнгә полиэтилен һәм пластик кулланудан баш тартырга, чүп-чарны аерым төрләргә бүлеп җыя башларга, иске кием-салымны эшкәртүгә тапшырырга кирәк иде. Марафонда катнашучыларның берсе - 24 яшьлек Айгөл Яфизова. Казанда яшәүче туташ бер атна эчендә барлык биремнәрне дә үти алды. «Минем фикеремчә, бу - дөньяны бераз яхшыртырга мөмкинлек бирә торган искиткеч проект. Биремнәр катлаулы түгел, аның каравы, аларда күпме файда бар. Алга таба да катнашачакмын», - диде А.Яфизова.

Шулай ук укыгыз

Барлык яңалыклар