Казанлылар «Тоталь диктант»та рус теле буенча белемнәрен тикшерә ала

Төп мәйданчыклар Пушкин исемендәге мәдәният үзәге, ТР Милли китапханәсе һәм КФУның Филология һәм мәдәниятара багланышлар институты булачак.

Фото: Денис Гордийко

(Казан шәһәре KZN.RU, 25 нче март). Тоталь диктант быел 9 нчы апрельдә узачак. Теләге булган һәр кеше анда үткәрү мәйданчыкларына барып та, онлайн-форматта да катнаша ала.

Диктант язу буенча Казанда төп мәйданчыклар булып А.С.Пушкин исемендәге мәдәни үзәк, Татарстан Республикасы Милли китапханәсе һәм КФУның Филология һәм мәдәниятара багланышлар институты торачак. Totaldict.ru сайтында үзең өчен уңайлы мәйданчыкны сайларга һәм теркәлү (30 нчы мартта ачыла) узарга мөмкин. Теркәлү һәр катнашучыга диктант язу мәйданчыгында махсус урын алып кую өчен кирәк.

Дикторлар сыйфатында актерларны, җырчыларны, блогерларны, җәмәгать эшлеклеләрен чакырачаклар. Быел «Тоталь диктант» өчен текст авторы язучы, шагыйрә, тәрҗемәче, сценарист, «Хирург», «Женщины Лазаря», «Сад» кебек романнар авторы, «Большая книга», «Национальный бестселлер», «Русский Букер» һәм «Ясная Поляна» премияләре лауреаты Марина Степнова булды. Диктантны әйдәп баручы эксперт-филологлар тикшерәчәк.

Диктант 14:00 сәгатьтә башлана, дип хәбәр итә акцияне оештыручылар.

Махсус оештырылган мәйданчыкларда чит ил студентлары TRuD тестын узачак, анда диктантның гадиләштерелгән текстын язу һәм рус теле буенча тест үткәрү каралган. Trud ның үзәк мәйданчыгы Татарстан халыклары дуслыгы йорты булачак.

Татарстан Республикасының Рус милли-мәдәни берләшмәсе белән берлектә ТР Яшьләр эшләре һәм спорт министрлыгы һәм ТР Мәгариф һәм фән министрлыгы ярдәме белән ТР «Мәдәният һәм диалог үзәге» төбәк яшьләр иҗтимагый оешмасы Татарстанда «Тоталь диктант»ны оештыручылар булып тора.

Узган ел Казанда «Тоталь диктант»ны 6055 кеше язган. Татарстан башкаласы, Мәскәүдән генә калышып, катнашучылар саны буенча Россия шәһәрләре арасында икенче урынны алды.

«Тоталь диктант» – ел саен үткәрелә торган мәдәни-агарту акциясе, ул рус телен өйрәнүгә кызыксыну формалаштыруга һәм рус телен чит тел һәм туган тел буларак өйрәнүчеләрнең грамоталылыгын арттыруга юнәлдерелгән. Беренче диктант 2004 елда булды. Елга бер тапкыр уза торган акциядән «Тоталь диктант» грамоталылык турындагы проект дәрәҗәсенә күтәрелде, ул дөрес сөйләшергә һәм русча язарга ярдәм итә. Хәзер проект диктантны гына түгел, ә курслар, китаплар, белем бирү постлары, лекцияләр һәм грамоталылык фестивален үз эченә ала.

Шулай ук укыгыз

Барлык яңалыклар