Казанлылар «Зәлидә» уены вакытында татар халык биюе хәрәкәтләрен өйрәнәчәкләр

«Хәрәкәттә – бәрәкәт» проектының ачык дәресе Бауман урамында 9 нчы августта узачак.

Фото: Денис Гордийко

(Казан шәһәре KZN.RU, 8 нче август). 9 нчы августта Бауман урамында казанлылар һәм шәһәр кунаклары «Зәлидә» уены вакытында татар халык биюе хәрәкәтләрен өйрәнәчәкләр. Чираттагы ачык чара «Хәрәкәттә – бәрәкәт» проекты кысаларында узачак.

Дәресләрне халыкара конкурслар һәм фестивальләр лауреаты, халык биюе педагог-хореографы Сәидә Минубаева һәм фламенко бию остасы, хореограф Гөлсинә Галимуллина алып барачак. Музыкаль озатуны баянчы Газинур Равилов, мультиинструменталист Айдар Абдрахимов, варгандагы уен мастеры Фәнил Вилданов тәэмин итәчәк.

«Зәлидә» – популяр татар музыкаль-бию уены, аның барышында гармунчы әйлән-бәйлән уртасында уйный, ә калган катнашучылар аның тирәсендә җырлый һәм бии. Элек «Зәлидә» мәзәк җәзалар башкару белән бергә барган, катнашучылар үзләренең тапкырлыгын, җитезлеген һәм тизлеген тикшерә алган. «Зәлидә»не яшьләр кичләрен уйнарга яраткан.

Мастер-класста катнашучыларның барысы да тандемда эшләячәк, шуңа күрә музыкантлар уенга үзләре кушылачак. Баян һәм варган уенны ритм һәм энергиялелек тәэмин итәчәк.

Мастер-класс 19:00 сәгатьтә башлана, ориентир – Бауман урамы буенча 24 нче номерлы йорт, дип хәбәр иттеләр Казан Башкарма комитетының Телләр культурасы өлкәсендә милли сәясәтне гамәлгә ашыру бүлегендә.

Чара Татарстан Республикасы Президенты каршындагы татар телен һәм Татарстан Республикасында яшәүче халыкларның туган телләрен саклау, үстерү мәсьәләләре комиссиясе ярдәмендә үткәрелә. Оештыручы булып Казан Мэриясе һәм шәһәрнең Парклар һәм скверлар дирекциясе тора.

Исегезгә төшерәбез, быел Казанның җәмәгать киңлекләрендә «Хәрәкәттә – бәрәкәт» проектының 5 җәйге спорт һәм иҗат дәресләре уздырылды. Соңгысында балалар һәм аларның әти-әниләре брейкингның база хәрәкәтләренә өйрәнде. Проект очрашулары сентябрьгә кадәр уздырылачак. Узган елның җәйге сезонында 14 дәрес үткәрелгән иде.

Шулай ук укыгыз

Барлык яңалыклар