Казанлылар өлкәннәргә һәм аз хәрәкәтле кешеләргә ярдәм итү өчен волонтерлыкка языла ала

Россия буенча «Без бергә» акциясенә инде 250 меңнән артык ирекле кеше кушылган.

Фото: ТР Яшьләр эшләре министрлыгы

(Казан шәһәре KZN.RU, 24-нче гыйнвар). Татарстанда «Без бергә» волонтерлык штабы эше яңартыла. Эпидемиологик хәлнең начарлануы сәбәпле волонтерларга ихтыяҗ арткан, бигрәк тә Казанда. Ирекле ярдәмчеләр өлкән һәм аз хәрәкәтле кешеләргә беренче кирәк булган товарларны китерү өчен кирәк.

Бүген республикада 6,6 меңнән артык кеше булган волонтерлар командасы эшен дәвам итә, алар хастаханәләрдә, вакцинация пунктларында ярдәм күрсәтә, азык-төлек, дарулар һәм беренче кирәк-яраклар китерә. Бигрәк тә бүгенге көндә автоволонтерлар кирәк, дип билгеләп үтә Татарстан Яшьләр эшләре буенча министр урынбасары Алла Кондратьева. «Волонтерлар шәхси яклау чаралары һәм ягулык карталары белән тәэмин ителә», – дип искәртте ул.

Барлык волонтерлар куркынычсызлык кагыйдәләрен саклый, алар ярдәм адресатлары белән турыдан-туры элемтәне булдырмый. Шулай ук ирекле ярдәмчеләр өчен битлек һәм перчаткалар кию мәҗбүри.

«Бөтен ил хәзер коронавирус пандемиясе белән көрәшә. Безнең республикада барлык муниципалитетларда #МыВместе штаблары ачылды, барлык волонтерлык оешмалары да бу эшчәнлеккә кушылды», – дип ассызыклады «Волонтер-табиблар» Бөтенроссия иҗтимагый хәрәкәтенең Татарстан бүлеге координаторы Анна Макарова.

Бүгенге көндә бөтен Россия буенча акциягә 250 меңнән артык волонтер, 9 мең партнер кушылган инде. 6,5 миллионнан артык кеше алардан ярдәм алган.

Барлык битараф булмаганнар акциягә кушыла ала, моның өчен + 7(843)273-16-72 номеры буенча шалтырату да җитә, дип хәбәр итә ТР Яшьләр эшләре министрлыгының матбугат хезмәте.

Исегезгә төшерәбез, Казанда коронавирус белән авырган халыкка дарулар китерү буенча 13 волонтерлык штабы эше дәвам итә. Беренче чиратта аларны ялгыз һәм өлкән яшьтәге шәһәр халкына китерәләр. Узган ел бу эштә 200 тирәсе волонтер катнашты.

Шулай ук укыгыз

Барлык яңалыклар