Казанлылар Инвалид балаларның ата-аналары өчен хокукый белем мәктәбе дәресләренә кушыла ала

Чара 21-нче августта видеоэлемтә режимында узачак.

(Казан шәһәре KZN.RU, 14-нче август). Казанлылар Инвалид балаларның ата-аналары (законлы вәкилләре) өчен хокукый белем мәктәбе дәресләренә кушыла ала. 21-нче августта видеоэлемтә режимында сәламәтлек мөмкинлекләре чикләнгән балаларга белем бирү хокукын гамәлгә ашыру турында, шулай ук инклюзив белем бирү чаралары ярдәмендә тернәкләндерү өчен психологик-медицина-педагогик комиссия (ПМПК) роле турында семинар узачак.

Ата-аналарга дәресләрдә инвалид балаларга һәм сәламәтлек мөмкинлекләре чикләнгән балаларга белем бирүне регламентлаучы норматив документлар хакында, балаларның белем алуга хокукларын гамәлгә ашырганда ата-аналар хокуклары турында сөйлиячәкләр. Шулай ук аларны җайлаштырылган программаларны гамәлгә ашыручы мәгариф оешмаларына балаларны кертү тәртибе һәм процедурасы, алар белән мөнәсәбәтләрне рәсмиләштерү тәртибе белән таныштырачаклар. Семинарда баланы психология-медицина-педагогика комиссиясендә тикшерү тәртибе һәм процедурасы, ата-аналарның хокуклары, комиссия карарларына шикаять белдерү тәртибе һәм процедурасы турында фикер алышу планлаштырыла.

Татарстан Республикасында Кеше хокуклары буенча вәкаләтле вәкил каршындагы Хокук белеме мәктәбе дәресләре инвалид балаларның ата-аналары (законлы вәкилләре) өчен 21-нче август 15.00 сәгатьтән 16.00 сәгатькә кадәр Zoomда узачак.

Катнашу өчен түбәндәге телефон буенча семинарга язылырга кирәк: +7(999)157-94-42. Әлеге номерга WhatsApp яки SMS-хәбәр аша тулы исем-фамилияне һәм телефон номерын җибәрергә кирәк. Шуннан соң һәр катнашучы конференциягә сылтама алачак, аңа билгеләнгән вакытта кушылырга кирәк булачак.

Моннан тыш, барлык теләүчеләр дә семинар вакытында җавап аласы килгән кыска сорауларын алдан ук җибәрә ала. Мондый сораулар Adelina.Galiullina@tatar.ru электрон почтасы аша кабул ителә, дип хәбәр иттеләр Татарстан Республикасында Кеше хокуклары буенча вәкаләтле вәкил аппаратында.

Шулай ук укыгыз

Барлык яңалыклар