Казанлылар «Бөтендөнья битлек киеп йөрү атналыгы» акциясенә кушыла ала

Республика һәм аның башкаласында яшәүчеләргә битлек киеп төшкән фоторәсемне социаль челтәрләрдә урнаштырырга тәкъдим итәләр.

(Казан шәһәре KZN.RU, 11-нчы август, Алинә Бережная). Татарстан «Бөтендөнья битлек киеп йөрү атналыгы» акциясенә кушылды. Ул 14-нче августка кадәр дәвам итәчәк һәм бөтен дөнья буйлап кешеләрне берләштерәчәк. Бу хакта бүген «Татар-информ» мәгълүмат агентлыгында узган матбугат конференциясендә ТР буенча Кулланучылар хокукларын яклау һәм кеше иминлеге өлкәсендә күзәтчелек федераль хезмәте идарәсе җитәкчесе урынбасары Любовь Авдонина сөйләде.

Акция социаль челтәрләрдә башланып китте. Аны хуплау өчен Insragram социаль челтәрендә #всемирнаянеделямасок хэштегы белән битлек киеп төшкән фотографияне урнаштырырга кирәк.

Любовь Авдонина ассызыклаганча, бүгенге көнгә битлек коронавирус инфекциясе белән көрәшүнең нәтиҗәле ысулы булып тора.

«Акция 14-нче августка кадәр дәвам итәчәк һәм кешеләрне коронавирус инфекциясенә каршы көрәштә берләштерә. Коронавирус инфекциясе белән зарарлану, башлыча, сөйләшү, ютәл вакытында аерылып чыга торган тамчылар аша уза. Битлек вирус таралуны тоткарлый», - диде Авдонина.

Спикер шулай ук Татарстанда битлек режимы эшләвен дәвам итә, аерым алганда битлекләр һәм перчаткаларны кию җәмәгать транспортында һәм кибетләрдә мәҗбүри, дип искәртте.

Шулай ук укыгыз

Барлык яңалыклар